apoiantes kaprez utiliza ekipamento estadu halo kampaña

Date ; 09-03-2012

Dili – Tuir monitorizasaun husi ekipa Provedoria dos Direitos Humanos e  Justiça (PDHJ) iha loron 5 to’o 8 Marsu 2012 ba aktividades kampaña husi kandidatus Presidente (KAPREZ) ba periodo 2012 – 2017  iha Distrito 12 sei kontinua utiliza ekipamentus estadu mak hanesan motorizadas no kareta hodi hala’o kampaña nomos iha violasaun ne’ebe mak mai husi ekipa team suksesu Nasional KAPREZ balun hodi insulta  KAPREZ balun ne’ebe la iha uma lisan.

Nune’ e mós identifika funcionarius publiku balun mak involve diretamente sai team suksesu mak hanesan profesores balun husi escola Secundariu, funcionárius balun husi Ministerio Agrikultura ne’ebe involve diretamente iha eventu refere, no mos funcionarius publiku iha Distritu balun mak abandona servisu durante kampaña KAPREZ ne’e nian, hateten Provedor de Direitus Humanus  no Justisa (PDHJ) Dr. Sebastião Dias Ximenes.

Provedor hatutan katak, funcionarius husi Departementu iha Distritu la iha disiplina no kumpri ba lei funsaun publiku ne’ebe temi katak funcionarius sira tenke hala’o dever loron ida iha oras walu nia laran maibe realidade hatudu katak iha Distritu kontrario fali  ho lei ne’e.

Iha  Suco Kribas Distrito Manatuto, ekipa monitorizasaun PDHJ  identifika  maioria labarik husi eskola Ensino Basico Central ( EBC)  Kribas la tuir prosesu aprendizajen iha oras eskola tanba labarik sira partisipa iha kampaña kandidatu Presidente.

PDHJ detekta  katak la iha prosesu aprendizajen iha eskola no maioria sala eskolas mamuk  mas iha profesores nain 3  deit mak hein iha eskola. Bainhira ofisial monitoring dada lia ho alunos balun, sira informa katak sira mak lakoi tama eskola,  inklui mos profesores  balun mak tuir hotu kampaña ne’e.

Entertantu iha Distrito Aileu, ekipa monitor PDHJ hala’o monitorizasaun ba aktividade kampaña husi KAPREZ balun identifika katak, maske  kampaña iha  motorizada ho  xapa matrikula marka  G mak  para iha fatin kampaña maibe la iha intimidasaun violasaun direitus humanus durante kampaña.

Konaba  seguransa ba KAPREZ,  Provedor hateten katak,  durante KAPREZ sira hala’o sira nia aktividade kampaña iha Distrito 12 hetan seguransa maximu husi Polisia, F-FDTL, Polisi Militar  no UNPOL.

Presiza informasaun kontaktu, Lady Ximenes 7304260, Dircia Xavier, 7119725 no Jose Tefa, 7351412.