Audiensia Públiku Ba Detensaun Polisia Iha Munisipiu Bobonaro
Bobonaro– Iha loron 3 fulan Agustu 2016, Provedoria dos Direitos Humanos e Justiça (PDHJ) Diresaun Nasional Fiskalizasaun no Rekomendasaun halo audensia públiku kona-ba “Detensaun Polisia”. Total Detensaun Polisia ne’ebé PDHJ halo monitorizasaun hamutuk 77 iha Timor laran tomak.
Adjunto Provedor ba área Direitus Umanus, Dr. Horacio de Almeida, iha abertura hateten ba partisipantes sira katak, objetivu husi audensia públiku ne’e hanesan parte ida atu rekolha tan pontus-pontus informasaun adisional balun molok atu públika relatoriu ne’e.
Adjunto husu ba partisipantes sira atu fó sira nia opiniaun no komentariu kona-ba situasaun detensaun husi polisia sira ne’ebé mak PDHJ halibur ona dadus, karik sei falta informasaun ruma mak seidauk kompleta husu informasaun adisional hodi kompleta. No mós husu ba partisipantes sira atu fó sira ninia sujestoens kona-ba rezultadu analiza, konkluzaun no rekomendasaun maka PDHJ dezenvolve ona liu husi materia aprezentasaun rezultadu monitorizasaun nian.
Iha oportunidade ne’e, Adjunto esplika ba partisipantes sira katak, Provedoria estabelese iha Konstituisaun RDTL artigu 27 ne’ebé hateten katak, Provedoria hanesan instituisaun independente ida ne’ebé nia papel atu rona komunidade sira nia halerik no keixa kona-ba lalaok governo nian.
Iha fatin hanesan, Reprezentante Komandante Polisia Munisipiu Bobonaro, Nelio de Jesus sente orgulhu ba Instituisaun PDHJ ne’ebé iha interese diak teb-tebes hodi halo peskiza ba servisu polisia nian, liu-liu ba sela detensaun polisia nian hodi hatene situasaun no kondisaun sela detensaun polisia sira nian iha territoriu laran.
Atual Komandante Operasional Polisia Munisipiu Bobonaro, husu ba partisipantes hotu atu tuir no rona didiak esplikasaun husi ekipa Provedoria nian kona-ba esbosu relatoriu monitorizasaun ba detensaun polisia nian ne’ebé PDHJ eskolha sai hanesan alvu monitorizasaun.
Entretantu iha seremonia enseramentu ba enkontru ne’e, Adjuntu Provedor hato’o agradesimentu ba partisipantes sira ne’ebé fó sira nia informasaun adisional. Nomos hamenu hela ba partisipantes katak sira nia informasaun hotu sei halo reanaliza hodi bele reforsa liu tan iha parte rekomendasaun mak PDHJ dezenvolve ona iha relatoriu monitorizasaun ninian, antes atu publika ba publiku no rekomenda ba Ministeriu kompetente atu bele hola responsabilidade para hadiak.
Atividade enkontru públiku ne’e, realiza iha salaun enkontru PDHJ Regional Bobonaro, ne’ebé hetan partisipasaun husi Adjuntu Komandante Munisipiu Ermera, Komandante Esquadra husi Munisipiu Covalima, Ermera no Bobonaro.