• Direitus Humanus Ita Hotu Nia Direitu No Dever

    Viqueque- “Mai ita hamrik hamutuk hodi defende ema seluk nia direitu. Ohin, aban no lor-loron” mak sai hanesan tema internasional ba selebrasaun loron mundial direitus humanus ba dala 68. Maibe hanesan ita hotu hatene katak, iha Konstituisaun RDTL artigu 27 establese Instituisaun ida ho naran Provedoria dos Direitos Humanos e Justiça (PDHJ) hanesan Instituisaun nasional direitus humanus ho nia mandatu hodi proteje no promove direitus humanus no promove governasaun diak. Ba tinan 2016, Provedoria dos Direitos Humanso e Justiça (PDHJ) komemora loron mundial direitus humanus hamutuk ho komunidade sira iha Suco Dilor, Posto Administrativu Lacluta, Munisipiu Viqueque ho teme nasional mak “Direitus Humanus Ita Hotu Nia Direitu No Dever”.
    Prevedor Direitus Humanus no Justisa (PDHJ) Dr. Silverio Pinto Baptista iha nia diskursu hateten katak, tinan ida ne’e, instituisaun Provedoria núdar orgaun independente ho nia mandatu hodi proteje no promove direitus umanus no promove governasaun di’ak, nomos ho ninia kna’ar tolu mak hanesan halo promosaun no edukasaun, investigasaun no fiskalizasaun no advokasia, selebra loron direitus humanus hamutuk ho komunidade sira iha Suco Dilor, ho objetivu atu hakbesik an no hametin relasaun entre PDHJ ho komunidade sira iha baze liu-liu ba komunidades sira iha Suco Dilor ne’e rasik.
    Provedor mos informa ba partisipantes sira iha selebrasaun loron mundial direitus humanus katak, ita hotu hanesan sidadaun laos ita atu koalia deit konaba ita nia direitu maibe keta haluha mos ita nia dever hanesan sidadaun, ita bele husu ita nia direitu maibe ita dever hanesan sidadaun tenke kompri.
    “atu realiza no implementa ita nia dever laos buat bo’ot ida hanesan sidadun tenke halo maibe ne’e buat simples no ki’ik depende ba ita ida-idak nia estatutu, karik hau hanesan estudante hau nia dever tenke eskola ou karik hau hanesan inan no aman tenke eduka oan sira ho diak, tanba ita nia oan sira mak sai hanesan herois jerasaun foun ba futuru Timor-Leste”, informa Provedor.
    Iha fatin hanesan, Administrador Posto Administrativu Lacluta, Jose Andrade dos Santos iha nia palabra sente kontente no haksolok bo’ot ba prezensa Sr. Provedor ho nia ekipa tomak iha Suco Dilor hodi komemora loron mundial direitus humanus hamutuk ho nia komunidades sira, atu nune’e nia komunidades sira mos bele hatene no konhese diak liu tan servisu husi instituisaun nian, tanba durante ne’e sira sou rona deit naran PDHJ maibe seidauk hatene lolos knaár husi instituisaun ne’e. Iha biban ne’e mos, Administrador Posto informa katak, hahu ohin ba oin komunidade Dilor sei relembra nafatin prezensa instituisaun Provedoria iha fatin ne’e hodi selebra loron bo’ot ne’e.
    Atividades ne’ebé hala’o iha loron importante ne’e mak hanesan pinta dezenhu, nata krupuk, nata berlindus no halai karong ba estudantes eskola primaria, dansa kultura ba estudantes Pre-Secundaria, diskursu ba estudantes Secundaria, tebe dai entre aldeia ferik no katuas, dada tali entre aldeia, volibol foodbol ba feto no mane entre PDHJ, juventude no PNTL.

Comments are closed.