Dra. Jesuina Gomes Hetan posse Ba Lidera PDHJ Hahu Husi 2018-2022

Dili : Hafoin Parlamentu nasional hala’o eleisaun iha loron 05 Novembro 2018 hodi hili Dra. Jesuina M. F. Gomes eleitu ba Provedora PDHJ maka iha loron 07 Novembru 2018, Parlamentu nasional hahu kedas ho entrega posse ba Provedora eleitu atu lidera Provedoria dos Direitus Humanos e Justiça (PDHJ) durante periodu 2018-2022.
Serimonia entrega posse ne’e, liu husi diskursu Provedora eleitu hato’o agradese wain ba distintos deputados hotu iha orgaun soberanu Parlamentu Nasional ne’ebé, fó ona sira nia votus de konfiansa ba iha eleitu atu lidera PDHJ durante tinan 4 nia laran.
“louva tebes desizaun Prezidente Parlamentu Nasional hodi implementa hodi implemnta artigu 12 Lei nu. 7/2004 kona ba prosedimentus nomeasaun ne’ebé promove ona prinsipiu transparensia,”hateten, Provedora eleitu.
Tanba ne’e, ba pozisaun Provedor-adjunto mós sei loke konkursu públiku tuir prosedimentus internos ne’ebé estabelese ona bazeia ba artigu 16 (2) Provedor-adjunto sira hetan nomeasaun bazeia ba kriteriu sira transparante no objetivu.
Maske nune’e, PDHJ rasik estabelese iha KRDTL artigo 27 no Lei nu. 7/2004 nu’udar orgaun independente ida ne’ebé iha kna’ar atu hare no buka hatan sidadaun sira nia problema hasoru poder públiku, ho kna’ar atu halo investigasaun, fiskalizasaun, promosaun, mediasaun no konsiliasaun iha área direitus umanus no governasaun di’ak.
Maibe, nasaun barak mak fahe área rua ne’e, instituisaun nasional direitus umanus no ombudsman maibe Timor leste iha instituisaun ida de’it, servisu Direitus umanus no Governasaun di’ak reforsandu mutuamente.
Tanba ne’e ba oin, PDHJ presija reforsa tan koperasaun institusional ho guvernu, entidades públikas nomos sosiedade sivil, reforsa komunikasaun no kordenasaun internal, programa no atividade foka ba vitima (victim orientation) no disseminasaun atu hasae konsiensia públiku, presija fó atensaun barak ba iha direitu ekonomia, social no kultura alende direitu sivil no politika , presija halo públikasaun ba rezultadu investigasaun no fiskalizasaun liga ho prinsipiu transparensia, no halao atividades DH no BG mais integradu.
“alterasaun ba Lei nu 7/2004 tamba iha mudansa barak mak akontese durante evolusaun PDHJ,”hatutan Provedora eleitu.
Serimonia tomada de posse ne’e rasik realize iha salaun konferensia Parlamentu nasional no hetan partisipasaun masimu husi Prezidente Meza Parlamentu nasional, deputadus, Xefe bankada inklui Provedor Sesante Dr. Silverio Pinto Baptista no adjunto sesante Dr. Horacio de Almeida no funsionarius PDHJ.