ESTADO EMERJÊNSIA: PDHJ monitoriza implementasaun Estado Emerjênsia

Durante primeiro no segundo dia husi Estado Emerjênsia, Ekipa Monitorizasaun PDHJ ne’ebé lidera husi Diretor Fiskalizasaun no Rekomendasaun, relata sidadaun Timor oan nain rua ne’ebé envolvido iha crime de tentativa homicídio iha área Palácio do Governo, ne’ebé suspeitos sira hetan atuasaun imediata husi segurança Policia Nacional Timor-Leste (PNTL). Akontesimentu ne’e hetan kobertura husi televizaun RTTL & GMN. 

Ekipa Fiskalizasaun halo vizita ba iha detensaun PNTL Munisípiu Dili hodi hasoru AJCSX. Fontes husi PNTL hatete katak suspeito ho inicial AJCSX halo tentativa homicídio ba vítima ida ho katana no agora submete ona ba processo investigasaun. PNTL mos konfirma katak PNTL hodi AJCSX ba kedan hospital hodi hetan tratamento saúde. AJCSX mos hetan assistência husi organizasaun  Pradet no hetan vizita husi família, maibe seidauk hetan asistênsia legal husi Defensória Pública.

AJCSX mos lamenta ho  atuasaun membros Unidade Policia Marítima balun ne’ebé uza forsa essesiva no agresiva hodi rega gas lakrimojêniu ba nia oin, aperta husi nia kakorok, tebe nia ho botas no hotar ho lian a’at ba nia a’an. 

PDHJ kontaktu ona Defensor Público Jeral hodi fo asistênsia legal ba AJCSX nomos kontaktu Komisariu PNTL hodi foti medidas própria ba membro UPM-PNTL  sira ne’ebe uza forsa essesiva ba AJCSX.

Ekipa fiskalizasaun PDHJ observa situasaun geral iha área Metiaut, Becora, Taibesi, Colmera, “Pantai Kelapa” to’o entrada Tasitolu. Observasaun iha terreno hatudu katak ema halo movimento ho ain iha dalan sira ho numero ne’ebé reduzidu; transporte público de passageiros kontinua halao operasaun mesmo que Decreto Governo No. 3/2020 bandu operasaun transportes públicos de passageiros iha território tomak; Transportes privados halo sirkulasaun iha dalan sira ho numero ne’ebé reduzidos; 

Estabelesimentu komersiais sira kontinua halo operasaun hanesan supermarcado Lider, W4, no Lita Store; Iha mercados sira hanesan Bekora, Taibessi no Manleuana kontinua lao normal; Centros Saúde sira hanesan Centro Saúde Formosa no Nain Feto halao atendimento saúde ba pacientes sira ho normal; 

Iha parte seluk ekipa task force COVID-19 hahu halo movimentu iha kapital Dili hodi fó avizu ba komunidade sira atu labele halo movimentu, tu’ur hamutuk ho numeru boot no hado’ok a’an husi moras refere liu husi hakmatek iha uma.

*Media PDHJ. 30/03/2020