• ESTADU EMERJÊNSIA: Antendimentu Servisu Saúde Comoro no Aeroportu Internasionál Prezidente Nicolao Lobato Kontinua Funsiona durante Estensaun Estadu Emerjênsia (EE) Datolu

    Dili, 08 Juñu 2020. Tama ba loron 13 estensaun EE ba dala 3, ekipa fiskalizadór PDHJ hala’o observasaun ba funsionamentu ba atendimentu públiku iha Servisu Sentru Saúde Comoro no Aeroporto Internasionál Prezidente Nicolao Lobato, Dili.

    Observasaun direita nebe ekipa hala’o iha Sentru Saúde Comoro, deteta katak:

    1. Ekipa Saúde ne’ebé fó atendimentu, mantein uza máskara no luvas
    2. Pasiente barak maka la uza máskara durante ba halo konsulta
    3. Iha fatin própriu ba triajen hodi atende pasiente ne’ebé iha sintomas ba Covid-19
    4. Iha markasaun ne’ebé kria ba pasiente sira hodi forma ka túr tuir distánsia físika maibé, pasiente barak la mantein distansia sosial metro 1.5.
    5. Ekipa Saúde prepara bee mos hodi fase liman iha portaun tama, maibé la iha sabaun.

    Ekipa fiskalizadór halo entrevista ho Xefi Sentru Saúde Comoro (Interina) Sra. Emilia Ayati de Sousa, esplika katak, estabelesimentu ba triajen la’o nafatin hodi fo teste ba pasiente sira ne’ebé iha sintomas Covid-19. Iha semana kotuk, iha tempu kalan ekipa saúde halo tratamentu iha sala emerjênsia no identifika pesoal ida ne’ebé maka hatudu sintomas Covid-19. Pesoal refere fulan hirak liu ba kotuk, tama ona karantina durante fulan ida no fila ona ba uma (sai ona).

    Xefe ne’e argument liu tan katak, wainhira ekipa saúde haruka halo teste ba pasiente refere, aman husi pesoál ne’e lakohi no tula nia oan fila ba uma. Pesoal saúde fó aimoruk ba pesoal ne’e hodi hemu iha uma. Hafoin, ekipa sentru saúde kontaktu ho ekipa vijilánsia hodi husu informasaun detallu husi pasiente ne’e. Informasaun husi ekipa vijilánsia dehan katak, pasiente ne’e uluk karantina iha Otel Luxury. Ekipa sentru saúde ba pasiente nia uma iha Pantai Kelapa no husu autoridade Aldeia iha ne’ebá, maibé la hetan pasiente refere. Ekipa fo nia aman nia naran ba autoridade refere hodi bele buka ema ne’e no wainhira hetan ona, bele informa fali ba ekipa saúde sira. Ekipa saúde kompostu husi laboratóriu, médiku, no vijilánsia hodi foti sampel no halo auto karantina ba pasiente refere. Ekipa vijilánsia seidauk entrega lista pasiente sira ne’ebé sai husi karantina no hela iha area Dom Aleixo ne’ebé perténsia ba ba Sentru Saúde Comoro nian.

    Iha EE ba dala 3 ne’e, pesoal saúde hotu-hotu tama ona servisu hodi halo atendimentu ba públiku. Maibé iha EE 1 no EE 2, sira halo servisu rotasaun hodi fahe tuir turno. Ekipa saúde no seguransa nafatin avizu ba pasiente sira hodi mantein distánsia fízika no uza máskara, maibé pasiente barak maka la kumpri distránsia social no barak maka la uza máskara no la fase liman. Ekipa saúde labele fasilita máskara ba pasiente sira hotu, maibé ba de’it pasiente ne’ebé hatudu sintomas durante sira halo tratamentu, tamba máskara la sufisiente no pasiente sira dehan osan la iha hodi sosa máskara. Ekipa saúde sira maka tenke proteje an rasik wainhira fó atendimentu ba pasientes. Aimoruk sufisiente, maibé protesaun saúde ba pesoál saúde maka menus, tanba ekipamentus protesaun hirak ne’e fó prioridade liu ba sira ne’ebé halo screening test no servisu iha laboratóriu.

    Entretantu, iha loron hanesan, ekipa fiskalizasaun PDHJ kontinua hala’o observasaun iha Aeroportu Internasional Prezidente Nicolao Lobato, Dili. Observasaun jerál hatudu katak, pessoál sira ne’ebé servisu iha aeroportu refere, prátika nafatin maneira mantein distánsia fízika, uza mascara, no mos iha fasilidades hanesan bee mos no sabaun hodi fase liman. Iha loron refere, pesoál sira iha Aeroportu halo atendimentu ba Voo Airnorth ho númeru 513 VH-ANT. Voo refere hetan kontratu ho Oitavu (VIII) Governu Konstitusionál hodi transporta ekipamentus médiku pakote ha’at (4) kona-bá Covid-19 ho todan kilograma 59. Voo refere to’o iha Dili horas 11.45 dader. Atividades iha Aeroportu kontroladu no seidauk iha voo ne’ebé halo operasaun hodi tula pasajeirus sira hanesan bai-bain.

Comments are closed.