• ESTADU EMERJÊNSIA: Monitorizasaun ba Servisu Atendimentu iha Centru Saúde Becora no Eskola Tékniku Vokasionál Ospitalidade no Turizmu-Becora durante Estadu Emerjênsia (EE)

    Dili, 10 Juñu 2020. Tama ba loron 15 estensaun Estadu Emerjênsia (EE) ba dala 3, ekipa fiskalizadór PDHJ hala’o observasaun no entrevista ho responsável sira iha prosesu atendimentu ba Saúde iha Centru Saúde Becora (CSB) no Eskola Tékniku Vokasionál Ospitalidade no Turizmu Bekora, Munisípiu Dili.

    Wainhira fiskalizadór PDHJ halo entrevista ho Xefe Centro Saúde Becora (CSB), Sra. Adelina Pinto. Lic. SP. MM, ligadu ho atendimentu públiku ba pasiente sira, inkluindu meius prevensaun ba COVID-19 ba populasaun sira iha área Cristo Rei. Xefe ne’e esplika katak, durante EE dahuluk to’o EE datoluk ne’e, CSB hala’o servisu hamutuk ho lideransa komunitária sira, oinsa bele hasa’e koñesimentu ba komunidade sira iha prevensaun ba COVID-19 nian. Agora daudaun, atendimentu iha servisu fatin la’o hanesan ba-bain, maibé númeru rejista pasiente maka menus tanba komunidade sira mantein hela iha uma de’it durante EE. Inan isin rua ne’ebé mai konsulta no sira ne’ebé mai partu, ami nafatin fó atendimentu iha CSB ne’e. Iha EE, atividade ne’ebé lala’o maka programa SISCa, tanba tuir EE, labele halibur ema barak no mantein distansiamentu fíziku, no transporte ba CSB mos ida de’it

    Kna’ar ne’ebé CSB halo dadauk agora maka, oinsa halo sosializasaun rutina durante loron 10 ligadu ba pagamentu subsídiu ba garegadu família ne’ebé fahe ba komunidade sira. Sosializasaun ne’e, liu husi promosaun móvel via kareta ne’ebé tama sai komunidade sira nia hela fatin, hodi fó avizu atu mantein distansiamentu fíziku, fase liman bebeik, no seluk tan. CSB mos iha planu ba semana oin, sei hala’o briefing ba professores sira, hala’o promosaun ba professores sira ho total escola 57 hahu husi pre-escolár to’o universidade ne’ebé zona Cristo-Rei nian, oinsa atu haré ba fasilidade fase liman, no numeru estudante hira maka sei túr iha sala laran tanba tenki mantein distansia. CSB Halo mos kordenasaun ho parte Saneamentu hodi haré ba fornesimentu bee. Hafoin haré hotu ida ne’e, sekarik prienxe ona kritéria maka sei rekomenda ba Governu atu bele reativa fali eskola, tuir regra estandarte Saúde Mundiál (WHO).  Nune’e mos, professores sira mos tenki hetan teste, hafoin bele halo reativasaun. Ekipamentu teste sintomas nian, depende oinsa servisu hamutuk ho parte Saúde no Edukasaun nian. Rekursu humanos iha CSB sufisiente no la’o di’ak nafatin, kooperasaun servisu durante ne’e ho autoridade lokal no Polísia sira la’o di’ak.

    Entretantu, iha loron hanesan, ekipa PDHJ kontinua halo monitorizasaun ba Eskola Tékniku Vokasional no Estudante Eskola Tékniku Vokassional Hospitalidade no Turismu (EhT)-Becora. Diretór eskola informa katak, durante EE dauluk no daruak, estudante sira eskola uza sistema online via telefone ka laptop/komputadór, balun liu husi GMN-TV. Maibé, iha EE datoluk ne’e, estudante sira tama eskola, maibé atividade ekstrakurikulár hanesan; volley-ball, tebe-bola no basketball maka la hala’o, tanba EE tenki kumpri regras sira. Estudante sira mantein uza máskara, maibé distánsia sosial metro 1,5 ne’e maka la kumpre, tanba númeru estudante ne’ebé barak tebes, entaun la konsege mantein distánsia fízika entre estudante sira. Maske nune’e, parte eskola fo avizu nafatin ba estudante sira hodi uza máskara, maske eskola la prepara máskara. Fasilidade fase liman ho sabaun, prepara nafatin husi eskola hodi fasilita ijiene estudante sira nian.

    Iha parte seluk, Diretur no estudante sira husu ba parte Ministériu Edukasaun no Desportu (MED) atu realiza ona Ezame ba estudante sira, tanba iha EE 1 no 2, professores sira fo matéria barak inklui ezersísiu ka TPC sira, no iha EE 3 ne’e estudante sira mai simu matéria no  limpeza de’it.

Comments are closed.