Estadu TL Halo Dialogu Ho Timor Oan Lakon Iha Tempu Okupasaun Indonesia

Dili– Iha loron 22 Maiu 2015, Instituisaun Provedoria dos Direitos Humanos e Justiça (PDHJ) hamutuk ho Organizasaun Naun Governamental (ONG) Asia Justice and Rights (AJAR) no Associasaun HAK organiza hikas Timor oan sira hirak ne’ebé lakon ka separadu ho sira nian familia iha tempu okupasaun Indonesia iha tinan 1975 to’o 1999, ne’ebé foin dadaun ne’e mai vizita sira nia familia hasoru malu ho entidades Estadu Timor-Leste hodi hato’o sira nia sentimentu no preukupasaun durante tinan naruk sira  moris iha ema nia rain Indonesia.

Dr. Horacio de Almeida,  Adjunto Provedor ba área Direitus Humanus iha entrevista hateten katak objetivu husi atividade diologu ne’e, atu elabora ideia hodi fortifika vontade politika nomos hametin mekanismu kooperasaun ba esforsu reunifika ‘labarik lakon’ sira ho sira nian familia iha tempu oin mai ka futuru.

Adjunto hatutun katak, PDHJ ho Komnas HAM (Komisaun Nacional Direitus Humanus) Indonesia halo kooperasaun ba asuntu ‘Labarik Lakon’ durante konflitu iha pasadu nomos hetan suporta husi ONG balu iha Indonesia no Timor Leste atu realiza reunifikasaun Labarik Lakon ka separadu forsadu iha tempu okupasaun Indonesia ho sira nian familia.

Atividade ne’e nudar kumprimentu ba Memorandum of Undestanding (MoU) ne’ebé PDHJ ho Komnas HAM Indonesia asina iha tinan 2012 liu ba hodi konkretiza rekomendasaun balu husi relatoriu CAVR no CVA.

Orador iha atividade ne’e  mak Sr. Depatado Arão Noe husi Bankada CNRT, Sr. Deputado Eladio Facultu husi Bankada Fretilin membru komisaun F Parlamento Nacional, Provedor Dr. Silverio Pinto Baptista, Xefi Casa Civil  Prezidente da Republika Sr. Fidelis Magalanhes, Diretora Nasinal Registo Notariado Ministério da Justisa, Sra. Maria D. R. Fatima, Komisaris Komnas HAM Indonesia Sra. Sandra Moniaga, Embaixador Indonesia ba Timor Leste, Sr. Primanto Hendrasmoro, no moderador mak Diretor AJAR Timor-Leste Sr. Jose Luis Oliveira.

Atividade ne’e realiza tanba servisu hamutuk entre Komnas HAM Indonesia, AJAR Indonesia no Timor Leste, PDHJ Timor-Leste, ELSAM, IKOHI, Yayasan HAK dan Kontras Indonesia, no hetan apoiu husi Sr. Dr. Rui Maria de Araujo, Primeiro Ministro RDTL no nia gabinete, Sra. Isabel Amaral Guteres, Ministra Solidariedade Social RDTL, Ministério Negócios Estrangeiros e Cooperasação Seksaun Konsular no Imigrasaun RDTL.