Date : 4-06-2012
Dili – Tuir Instituisaun Provedoria dos Direitos Humanos e Justiça (PDHJ) nia hare ba situasaun feto iha nasaun foun Timor-Leste iha tinan 10 nia laran iha progresu bo’ot iha area hotu-hotu maski nia dezenvolvimentu iha aspeitu ida no aspeitu seluk la hanesan maibe hanesan iha area edukasaun feto maluk barak mak eskola to’o ona nivel Universidade ho percentajen ne’ebe bo’ot no numeru feto ne’ebe envolve iha vida politika mos as.
“Ita bele hare besik 29.2% tur iha uma fukun Parlamento Nasional, iha Funsionariu Publiku feto barak okupa ona kargu Xefia, Direktora no iha numeru signifikante mak tur iha pozisaun as hanesan Vice Ministra no Ministra no mos agora dadaun lei violensia domestika iha ona atu garante protesaun ba feto iha kazu violensia domestika ne’ebe barak liu feto sira enfrenta,” Hateten Provedor Interino atual Provedor Adjuntu ba area Direitus Humanus, Dr. Silveiro Pinto Baptista iha servisu fatin Caicoli-Dili, Sesta-Feira (1/6).
Silveiro hatutan katak, vantajen bo’ot seluk mak husi Konvensaun 7 ne’ebe nasaun Timor-Leste adopta ona, iha Konvensaun Eliminasaun forsa hotu diskriminasaun kontra Feto (CEDAW) no mos iha aspektu justisa, iha parte judisiaria, feto maluk barak mos kaer knar importante nomos iha numeru feto ne’ebe sufisiente atu sai balansu ba mane sira ne’ebe tur iha pozisaun importante atu hare ba lia los.
Silveiro mos rekonhe katak, maske nune’e iha progresu neneik iha assunu balun partikularmente esforsu sira atu hare konsekuensia konflitu no iha prosesu hari’I dame no rekonstrusaun sira.
Entertantu, Provedor Interino mos hateten katak, iha tempu badak PDHJ servisu hamutuk ho sociadade sivil sira hanesan ONG Rede Feto, Fokupers, APSC-TL, STP-CAVR, ICTJ, HAK, Alola Fundation, FKSH no inklui mos Governo liu husi Ministerio Negosiu Estrangeiro no CEDAW export Office sei hala’’o seminariu internasional ho tema “Reflesaun Tinan 10 Independensia Timor-Leste ba Direitu Feto iha Post Konflitu”
Aktividade ne’e sei hetan partisipasaun masimu husi reprezentante membrus Governo husi MNE, SEPI, MSS Deputado Parlamento Nasional, parte Igreja, ONG Asosiasaun Vitima husi Indonesia no oradores husi Komnas Perempuan Indonesia.
Presiza Informasaun Kontaktu Lady Ximenes, TP Relasaun Públika PDHJ Telemovel 7304260 ou Jóse Tefa 735 1412 ou 3331071