Funsionáriu PDHJ 25 tuir formasaun iha INAP

Dili : Durante loron 5 hahu husi loron 17 to’o 21 Dezembru 2018, funsionáriu Provedor dos Direitus Humanus e Justiça (PDHJ) hamutuk 25 tuir formasaun iha Instituisaun Nasional Administrasaun Publika (INAP) kona-ba “Jestaun Eskritória no Atendimentu publika”.

Provedora, Jesuina Maria Ferreira Gomes, MPA hateten, formasaun ida ne’e, hanesan formasaun bazíku ho nia titlu “Jestaun Eskritóriu” ba funsionáriu sira liu-liu ba funsionáriu Assistente Provedoria nian hamutuk ema nain 25 ne’ebé tuir durante loron 5 iha INAP.

Provedora hatutan katak, formasaun ne’e, realiza tanba servisu hamutuk entre PDHJ ho INAP rasik, ne’ebé papel Provedoria nian hakarak atu reforsa INAP hanesan Instituisaun publika ne’ebé iha kompetensia atu fornese formasaun ba funsionáriu no ajente administrasaun publika sira, liu-liu liga ho prinsipiu da efisiênsia no efikasia.

“Ba formasaun bazíka sira ne’ebé ita bele halo iha rai laran, ita halo iha rai laran deit la persiza gasta kustu bo’ot atu lori funsionáriu sira ba formasaun iha rai liur”, dehan Provedora.

Fundus ba formasaun ne’e, Provedora esplika katak, formasaun ba etapa ida ne’e fundus hamutuk rihun 14 dollares amerikanu, ne’ebé PDHJ hetan apoiu husi Fundu Dezenvolvimento Capital Humanu (FDCH), maibe tuir estimasaun gastus ba etapa formasaun ida ne’e, provolta rihun nen dollares amerikanu.

Provedora espera katak, ho formasaun ne’e, bele hasa’e koñesimentu no hasa’e abilidade nomos iha mudansa ba atetudi liu-liu ho topiku jestaun eskritoriu tanba iha jestaun eskritoriu ne’e, funsionáriu sira sei aprende kona-ba jestaun arkivu, jestaun atendimentu públiku ne’ebé importante tebes ba funsionáriu sira, tanba liga ho servisu PDHJ nian ne’ebé iha knár importante ida atu simu keisar husi sidadaun sira, ne’ebé funsionáriu sira tenke hatene kona-ba oinsa jestaun atendimentu públiku no liga mos kona-ba komunikasaun, kordenasaun ekipa de servisu.

Iha fatin hanesan, Diretor Geral INAP, Agostinho Letêncio de Deus, M.AP hateten mos katak, formasaun ida ne’e, realiza tanba iha koperasaun servisu entre PDHJ ho INAP ne’ebé lansa ona iha tinan kotuk no hetan orsamentu husi Fundu Dezenvolvimento Capital Humanu (FDCH) ne’ebé aloka liu husi PDHJ.