Funsionariu PDHJ Partisipa Treinamentu kona-ba TAKLU/CAT

Distritu Lautem: Funsionariu sira iha Provedoria dos Direitos Humanos e Justiça (PDHJ) partisipa treinamentu kona-ba hakerek relatoriu no advokasia kona-ba Konvensaun Hasoru Tortura, tratamentu sira ne’ebé kruel, Dezumanu no Degradante (TAKLU/CAT) husi loron 4-5 Setembru 2014 iha Com-Lautem.

Formador iha treinamentu ne’e maka Sra. Anjet Lanting, Asesora Direitos Umanus, United Nations Resident Coordinator’s Office no Sr. Sabino Mendonça, Ofisial Direitus Umanus husi United Nations Resident iha Timor-Leste. Parseiru implementador maka PDHJ, Onu nia Unidade Asesoria ba Direitus Umanus, OHCHR/UNDP ba Kapasitasaun PDHJ

Valerio Magno Ximenes, Diretur Nasional Direitus Humanos hateten formasaun ne’e-nia objetivu maka funsionariu sira hasa’e sira-nia koñesimentu no abilidade hodi inkorpora saida maka funsionariu sira aprende ona iha sira-nia serbisu, atu hakerek relatoriu tratadu nian no implementa estratéjia advokasia.

Valerio hatutan tan, rezultadu husi formasaun ne’e funsionariu sira iha koñesimentu hodi hakerek relatoriu tratadu nian ba Komisaun Hasoru Tortura tuir objetivu husi Planu Asaun Anual PDHJ tinan 2014. Nune’e mos funsionariu sira iha koñesimentu hodi hala’o serbisu advokasia relasiona ho Tratamentu a’at/tratamentu degradante no Konvensaun Kontra Tortura (TAKLU/CAT) no mos Opsional Protokolu Konvensaun Kontra Tortura (OPCAT) tuir objetivu PDHJ nia Planu Estratéjiku 2011-2020.