• Funsionariu Públiku Tenki Servisu Ho Responsabilidade

    Dili– iha loron 31 Marsu 2016, Provedoria dos Direitos Humanos e Justiça (PDHJ) Diresaun Boa Governasaun Departamentu Promosaun no Edukasaun servisu hamutuk ho Comisaun Anti Corupsaun (CAC), Inspetor Jeral Estado (IJE) no Komisaun Funsaun Públika (KFP) realiza workshop nasional ba Funsionáriu Públiku iha Ministério Defeza no Instituisaun F-FDTL ho tema “Promove Governasaun Diak no Proteje Direitus Humanus iha servisu Administrasaun Públika nian”. Objetivu workshop ne’e, atu disemina informasaun konaba papel PDHJ, CAC, IJE no KFP ba Funsionáriu Públiku iha Ministério Defeza no Instituisaun F-FDTL, atu nune’e bele hatene diak liu tan servisu husi instituisaun hirak ne’e. Provedor, Dr. Silverio Pinto Baptista iha aprezentasaun materia kona-ba kna’ar PDHJ nian husu ba Funsionáriu Públiku husi Ministério Defaza no Instituisaun F-FDTL atu servisu ho responsabilidade tanba instituisaun  Provedoria hanesan instituisaun ne’ebé kontrola ba atividades husi governantes sira nian. Provedor esplika tan katak, mandatu husi Provedoria mak atu proteje no promove direitus humanus no promove boa governasaun, no ho nia natureza servisu atu fiskalizasaun no advokasia, promosaun no edukasaun no halo investigasaun. Husi rezultadu investigasaun ne’ebé halo, PDHJ sei la hola desizaun maibe hato’o de’it rekomendasaun ba Ministério relevante sira no ikus hato’o rekomendasaun ba Parlamento Nasional. Iha aprezentasaun materia, Provedor dehan ba partisipantes sira katak, iha lei mos hateten instituisaun  PDHJ iha kna’ar importante ida atu tau matan ba servisu funsionariu públiku hotu no laos deit tau matan no investiga deit, maibe hare mos ba buat ne’ebe lao iha administrasaun públiku la tuir lei ne’ebé iha presiza kolabora hamutuk hodi hadia. Aleim de koalia kona-ba kna’ar Provedoria nian, Provedor mos esplika kona-ba importansia direitus humanus tanba ita nudar servidor estadu persiza mos hatene kona-ba saida mak violasaun direitus humanus no saida mak krime, no sei mak sai autor ba violasaun direitus humanus no krime ne’e. Iha atividade workshop ne’e fahe ba sesaun rua, sesaun dahuluk, Provedor, esplika kona-ba papel PDHJ nian, Adjunta ba area Boa Governasaun, Dra. Jesuina Maria Ferreira Gomes, MPA,  esplika kona-ba prinsipius boa governasaun, Xefi Departamentu Keixa no Reklamasaun, Sra. Josefa S. D. J. da Silva, esplika kona-ba prosesu hato’o keixa ba PDHJ no Inspetor Jeral Estadu, Sr. Francisco de Carvalho, esplika kona-ba papel husi Inspesaun Jeral Estadu. No iha sesaun daruak nian mak Komisariu Comissão Anti-Corrupção (CAC) Dr. Aderito Pinto Tilman, esplika kona-ba papel CAC nian no Prezidente Komisaun Funsaun Públika, Sr. Faustino Cardoso Gomes, esplika kona-ba papel KFP nian.

Comments are closed.