• Hasae kapasidade funsionariu pdhj tuir treinamentu iha filipina

    Data, 16-02-2007

    Atu hasae kapasidade funsionariu sira nian husi Provedória dos Direitus Humanos e Justiça (PDHJ) sei haruka funsionariu nain 4 ba Filipina durante semana ida hahu husi loron 17 Fevereiru to’o loron 27 Fulan Fevereiru hodi tuir treinamentu.

    Treinamentu ne’ebé sei hala’o iha Universidade de Davao City Filipina ne’e ho objetivu atu bele aumenta kapasidade funsionariu sira liu-liu husi area asistensia publika no dokumentasaun kona-ba sistema jestaun ba file.

    Funsionariu sira ne’ebé sei tuir treinamentu iha nasaun ne’ebé refere hamutuk ema nain 4 mak hanesan Gina Leila de Oliveira Alves, Direitora Interina ba Diresaun Asistensia Públika, Ludovina das Neves Santana, Pessoal Dokumentasaun & Arkivu, Jose Manuel Fereira, Investigadór ba area anti-korupsaun no Antonio Martino Soares da Costa Lopes, investigadór iha area Direitus Humanos.

    Treinadór ne’ebé mak sei fasilita treinamentu ne’e mak hanesan Dr. Ronnie Amorado no Dr. Nilda Ginete husi universidade de Davao City Filipina.

    Gina Leila de Oliveira Alves nu’udar partisipantes ida ne’ebé sei tuir treinamentu ne’e hateten katak treinamentu ne’e importante tebes atu bele aumenta kuiñesimentu ba Diresaun Asistensia Públika rasik hodi fasilita servisu ne’ebé efetivu liu ba diresaun tolu hanesan Diresaun Direitus Humanos, Boa-Governasaun no Diresaun anti-korupsaun ne’ebé sai nu’udar mandatu importante PDHJ nian.

     

    “ Liu husi treinamentu sira hanesan ne’e bele fó kuiñesimentu di’ak liu tan ba funsionariu PDHJ nian hodi dezenvolve no hadi’a sistema simu no arkivu keixa hirak ne’ebé sidadaun sira hatada ba Provedória nakonu ho responsablidade atu bele mantein konfidensiliadade ne’ebé mak sai dever funsionariu tomak iha PDHJ, Gina hato’o nia esperansa”.

     Durante partisipantes sira tuir treinamentu hetan apoi husi USAID liu husi MSD (Management Sciences For Development).

    Depois de treinamentu ekipa ne’e sei hala’o estudu koparativu iha Ombudsman Head Office, Law offices, Komisaun Rejional Direitus Humanos (Region XI) no Blue Ribbon Committee (Legislative Assembly) iha Davao City kona-ba oinsa jestaun file.

    Presiza informasaun kontaktu

    Lady ximenes

    Informasaun & Relasaun Públika

    No telp 333 1071 ou no telemovel 726 1843