• Hasa’e Koñesimentu Importante Hodi Garante Boa-Governasaun

    Distrito Liquiça – Provedoria dos Direitos Humanos e Justiça (PDHJ) liu husi Diresaun Nasional Boa Governasaun, Departamentu Promosaun no Edukasaun hamutuk ho Inspesaun  Geral do Estado (IGE) no Gabinete Inspesaun no Fiskalizaun Auditorial Ministério Saude (GIFA-MS) realiza treinamentu konjuntu ba kargu xefias Ministério Saude Municipiu Liquiça durante loron 3 hahu husi loron 1 to’o 3 Juñu 2015 iha salaun Polo Medicina UNTL Liquiça.

    Adjunta Provedora ba área Boa Governasaun, Sra. Jesuina Maria Ferreira Gomes, MPA iha ninia materia  aprezentasaun konaba kna’ar PDHJ nian hateten ba partisipanetes sira katak, atu garante boa governasaun iha servisu laran, meus ida mak hasa’e koñesimentu hodi bele garante no promove governasaun diak iha servisu fatin ida-idak nian.

    Adjunta hatutan, objetivu treinamentu konjuntu ne’e mak atu hasa’e koñesimentu iha área administrasaun públika hodi dezempeña funsaun ho responsabilidade atu presta servisu ho diak ba públiku tanba Ministério Saúde nia kna’ar liga diretamente ho públiku, no mos atu promove no haburas governasaun diak liu husi kontrolu ne’ebé diak no servisu ne’ebé efikas no efisiente.

    “Ita hatene katak, obstákulu bo’ot ida ne’ebé akontese iha boa governasaun mak falta kapasitasaun ba funsioáriu sira. Tanba rekursus humanus mos sai obstákulu  ida, mak persiza kapasita nafatin funsionáriu públiku sira para hasa’e no haburas ka haklean tan sira nia koñesimentu,  maski imi iha tiha ona koñesimentu iha área saúde nian, maibe persiza nafatin kapasita a’an hodi presta servisu diak liu”, dehan Adjunta ba partisipantes sira.

    Adjunta mos husu ba partisipante sira atu tuir treinamentu ne’e ho seriedade tanba liu husi treinamentu ne’e bele haklean sira nia matenek hodi hala’o servisu ho integridade no profesionalismu.

    Iha fatin hanesan, Diretor Jeral Ministério Saúde, José dos Reis Magno hato’o ba partisipantes sira katak, atividade ne’e foin primeira vez realiza tanba foin halo akordu atu servisu hamutuk iha fulan kotuk liu ba, no nia objetivu servisu hamutuk entre PDHJ ho IGE hanesan passu importante tebes atu kapasita ita nia a’an rasik no mos hatudu ita ba dalan ne’ebé los, hodi  servisu tuir prinsipius governasaun diak, atu nune’e iha futuru ita nia povu la bele hakilar tan ita nia Ministério konaba prosesu atendimentu ba públiku sira.

    Diretor Jeral husu ba partisipantes sira atu tuir treinamentu ne’e ho seriadade, atu nune’e materia ne’ebé imi hetan sai hanesan mata dalan no bukae ida ba imi bele implementa iha servisu fatin ida-idak nian no mos bele hatene diak liu tan konaba kna’ar PDHJ no kna’ar IGE nian.

    Atividade treinamentu ne’e, loke husi Diretor Jeral Ministério Saúde, Sr. José dos Reis Magno, akompaña husi Provedora Adjunta área Boa Governasaun Sra. Jesuina Maria Ferreira Gomes, MPA no Inspetor Jeral Estado, Sr. Francisco de Carvalho

Comments are closed.