• Hasa’e Koñesimentu Membrus F-FDTL Iha Área DU

    Hera : Durante loron 5 hahu husi loron 11 to’o 15 Marsu 2019, Provedoria dos Direitos Humanos e Justiça (PDHJ) hamutuk ho Ministério Defesa no Seguransa (MDS), Falintil Forsa Defesa Timor-Leste (F-FDTL) no Unidade Assesoria Direitsu Umanus (UADU) iha Timor-Leste, realiza treinamentu direitus umanus no kna’ar F-FDTL ba Ofisial F-FDTL Komponente Naval Hera-Dili.

    Provedor Interino, Dr. Miguel Pereira de Carvalho, iha abertura ba atividade treinamentu ne’e, hateten katak kooperasaun ida ne’e, núdar komprimisiu ida hodi implementa hamutuk atividade treinamentu ba membru F-FDTL. Esforsu ida ne’e ho objetivu atu hasa’e koñesimentu no kapasidade membru F-FDTL sira kona-ba direitus umanus hodi haforsa no hametin respeitu no protesaun direitus umanus iha Timor-Leste.

    F-FDTL sira sai hanesan forsa ida ne’ebé demokrátiku no responsavel, iha dever hodi respeita no proteje ema hotu nia direitus umanus ne’ebé konsagra iha Konstituisaun RDTL nomos lei Internasional sira ne’ebé estadu Timor-Leste ratifika ona.

    “Tan ne’e, atividade treinamentu ida ne’e, importante tebes atu eleva membrus F-FDTL sira nia koñesiementu iha área direitus umanus, hatene regras no norma sira lei Nasional no Internasional hodi respeita nafatin ba direitus umanus wainhira hala’o kna’ar lor-loron iha komunidade nia le’et”, esplika Provedor Interino.

    Provedor Interino hatutun katak, treinamentu hanesan ne’e, sei kontinua hala’o ba membrus F-FDTL iha Komponente hotu, no mos ba membru F-FDTL sira ne’ebé detakadu iha Postu no Munisipiu sira ho obejtivu ne’ebé hanesan.

    Iha biban ne’e, hato’o agradesementu ba koperasaun diak husi Komando Jeral F-FDTL, Ministério Defeza no Unidade Asesoria Direitus Umanus (UADU) ONU iha Timor-Leste no PDHJ hodi realiza treinamentu direitus umanus ba memnru F-FDTL husi Komponente Naval.

    No ikus liu liu, hakarak hato’o mos agradesementu ba treinador sira husi parte F-FDTL, Ministério Defeza, UADU no mos PDHJ rasik, ba iha preparasaun, kordenasaun no realizasaun treinamentu ne’e.

    Komendante Interino Komponente Forsa Naval, Kapitaun Tanente João de Fatima “Buka Tuir” hateten katak, formasaun ba membrus forsa Naval konaba asuntu direitus umanus importante tebes, atu nune’e ami nudar lutu ba nasaun bele hatene mos saida mak direitus umanus.

Comments are closed.