KFP Realiza Selesaun Por Mérito Ba Kargu Diresaun No Xefia PDHJ

Dili- Durante loron 2, hahu husi loron 27 to’o 28 fulan Fevereiru tinan 2017, Komisaun Funsaun Públika (KFP) liu husi ekipa júri ne’ebé establese tiha ona realiza prova eskrita ba kandidatu selasaun por mérito hodi kompete ba kargu Diresaun no Chefia iha Instituisaun Provedoria dos Direitos Humanos e Justiça (PDHJ).
Iha entrevista, Prezidente de Júri Sr. Vitor Manuel de Deus Maia hateten, Komisaun Funsaun Públika liu husi ekipa de júri ne’ebé establese tiha ona realiza prova eskrita ba kandidatu por mérito hodi kompete ba kargu Diresaun no Chefia iha PDHJ.
Prezidente hatutan, kandidatu ne’ebé tuir prova eskrita mai husi funsionariu parmanente sira ne’ebé servisu ona iha PDHJ inklui mos funsionariu balun husi Ministério seluk mak tuir prova eskrita ne’e hodi kompete ba kargu Diresaun no Chefia iha PDHJ.
Rezultadu prosesu avaliasaun dokumentus hatudu katak, iha kandidatu hamutuk 112 ne’ebé kompostu husi kandidatu mane hamutuk 74 no feto 38, no husi total kandidatu hirak ne’e iha kandidatu hamutuk 62 mak admitidus hodi tuir prova eskrita ne’ebé mai husi mane 53 no feto 9.
Entretantu kona-ba kandidatus sira ne’ebé la passa selesaun dokumentus, Prezidente de Júri esplika katak, ekipa de Júri halo avaliasaun dokumentus bazeia ba termu referensia ne’ebé establese ona no tuir pozisaun ida-idak nian.
Depois prosesu prova eskrita remata, ekipa de júri sei tur hamutuk fali hodi diskute no termina loron ba kandidatus ne’ebé passa prova eskrita hodi tuir fali prosesu entrevista nian. No tuir kalendariu husi ekipa júri determina katak sei finaliza prosesu selesaun por mérito ne’e iha fulan Abril tinan ida ne’e.
Atividade prova eskrita ne’e realiza iha edifisiu KFP salaun Casa Europa-Dili no ekipa de júri kompostu husi Sr. Vitor Manuel de Deus Maia, nudar Prezidente de Júri, Sr. Francisco de Carvalho (vogal), Sra. Jesuina M. F. Gomes (vogal), Sr. Jose Telo Soares Cristovão (vogal) no Manuel C. C. B. Corte Real (vogal), Sr. Horacio de Almeida (suplente).