• Komunikadu ba Imprensa Enkontru SEANF La’o Ho Susesu

    Dili– Provedoria dos Direitos Humanos e Justiça (PDHJ) ho susesu realiza enkontru  Technical Working Group (TWG) Meeting ba South East Asia National Human Rights Institution Forum  (SEANF) durante loron 2 husi 19 to’o 20 Marsu iha hotel Garden Beach Dili-Timor-Leste.

    Nasaun sira ne’ebe partisipa iha enkontru SEANF ne’e, maka nasaun sira ne’ebe sai ona membrus permanente ba SEANF hanesan Filipina, Malaysia, Indonesia, Myanmar, Thailandia no Timor-Leste. Participa mos iha enkontru ne’e, Presidente Comisaun Nasional Direitus Humanus Thailandia nian ne’ebe sai mos Presidente ba Instituisaun Nasional Direitus Humanus ASIA Pacific Forum, husi Indonesia participa husi Vice Presidente Komnas HAM nian no nia Secretario Geral.

     

    Dr. Sebastião Dias Ximenes, Provedor iha nia abertura ba enkontru internasional ne’e, fo benvindu no agradecimentu ba participantes sira husi nasaun membrus SEANF ne’ebe mak atu tuir  Technical Working Group (TWG) meeting iha nasaun Timor-Leste.

     

    Provedor esplika katak, objetivu husi enkontru ne’e, atu hare fila fali isu direitus humanus ne’ebe mosu iha nasaun membru ida-idak nian.

     

    Provedor mos hatutan, durante enkontru ne’e nasaun membrus ida-idak aprezenta sira nia isu konaba direitus humanus ne’ebe mosu iha ida-idak nia nasaun. Isu sira ne’ebe diskuti durante loron 2  mak hanesan Bisnis no Direitus Humanus, ema hetan torturasaun no detein iha prizaun, ema ne’ebe moris iha area remotas sira nia direitu no diskuti mos konaba tragedia iha Saba-Malaysia.  Entretantu nasaun Timor-Leste liu husi ninia instituisaun PDHJ aprezenta isu konaba eviksaun no trafiku humanu ne’ebe mosu iha territorio Timor-Leste.

     

    “Nasaun Timor-Leste halo hela esforsu atu sai membro ba ASEAN, maibe PDHJ nu’udar órgaun independente  ne’ebe iha kna’ar atu proteje no promove direitus humanus, iha tinan 2010 integra a’an ona no sai membro ba Forum Instituisaun Nasional Direitus Humanus iha Sudeste Aziátiku no agora dadaun lidera forum ne’e”, esplika Provedor.

     

    Durante partisipantes sira iha Timor-Leste, laos halo enkontru deit, maibe halo mos vizita ba estatua Cristo Rei, Merkado Tais, no mos vizita ba Maubara, Igreja Liquiça (fatin massacre 1999), eis prizaun Portugues iha Aipelo no vizita mos ba Museum Rezistencia Nasional Timor-Leste.

    Participantes sira kontente ho estadia kalan 3 iha Dili durante enkontru SEANF nian, no tuir planu PDHJ sei sai uma nain ba Annual Meeting SEANF nian iha fulan Setembru 2013.

     

     Presiza Informasaun Kontaktu Lady Ximenes ho No. Telemovel  7730 4260 ou Jóse Tefa 7735 1412 ou 3331071.