komunikadu ba imprensa
Date : 12-07-2012
Dili – Tuir rezultadu observasaun ekipa monitorizasaun Provedoria dos Direitos Humanos e Justiça (PDHJ) ba eleisaun lejislativa iha loron 7 de Jullu de 2012 ne’ebe halo iha territorio laran, em jeral lao diak, maibe ekipa PDHJ identifika iha centro votasaun balun iha eleitores balun tenta atu vota dala rua (2) maibe Polisia Nasional Timor-Leste (PNTL) hatene no konsegue kaptura.
Dr. Sebastião Dias Ximenes, Provedor hateten katak tuir observasaun ekipa monitorizasaun PDHJ identifika katak, pozisaun kabina de votus iha fatin centru de votasaun la hatur hanesan, balun eleitor fila kotuk ba parede, balun fila kotuk ba fiscais sira, balun fila kotuk ba publico no besik odamatan tama.
Kabina de votus ne’ebé eleitor sé kotuk ba komunidade no fiscais sira, ida ne’e fó inpaktu ba votantes sira ne’ebe atu vota, no ema seluk bele hare, nune’e la vota ho livre, tanba bulletin de voto ne’e bo’ot, nomos wainhira ema lulun atu hili, ema seluk bele hatene votante atu hili saida.
Kazu sira ne’e akontese iha Centru Votasaun eskola Primaria Públiku Suku Wailili, Sub-Distrito Baucau, Distrito Baucau, Centru votasaun eskola Primaria Fatumasi, Suku Fatumasi, eskola Primaria Aldeia Baura, Suku Leorema, Sede Suku Leorema, Sede Suku Metagou, eskola Secundario numeru 1 Liquiça Villa, Suku Tibar, Sede Suku Ulmera, no Sede Suku Mota Ulun, Sub-Distrito Bazartete, Distritu Liquiça, eskola Primaria Asumanu, Suku Asumanu, Sede Suku Daru-Lete, Sub-Distrito Liquiça, Distrito Liquiça.
Provedor haktuir katak kabina votasaun nian sai preokupasaun iha fatin votasaun hanesan iha centru votasaun eskola Primaria Públiku Kuluhun, Suku Kuluhun, Sub-Distrito Cristo Rei Distrito Dili bainhira senhora ida ba vota la bele vota ho diak tanba bainhira senhora atu vota nia oan hare hela nian (tuir informasaun ne’ebe hato’o husi senhora ba ekipa PDHJ).
Iha Centru Votasaun Paioto, Sub-Distrito Lospalos, Distrito Lautem, monitor PDHJ identifika katak, iha centru votasaun refere nakukun tebes, nune’e eleitores balun la bele hare bulletin de voto ho diak. Kestaun ne’e akontese tanba elektrisidade la lakan iha momentu ne’eba, nomos votante fila kotuk ba fiscais ho distancia ne’ebe besik, no fiscais bele hare saida mak votante ne’e vota.
Iha mos centro de votasaun hanesan eskola Conis Santana Lospalos, kabina de votasaun besik odamatan, no ema ne’ebe vota fila kotuk ba odamatan, nune’e ema sira ne’ebe hein atu tama bele hare saida mak votante ne’e hili, ida ne’e la garante ema nia segredo de voto. Haktuir Provedor.
Entretantu Provedor hateten katak, PDHJ elojia povo Timor-Leste tomak ne,ebé hatudu duni ninia maturidade politika hodi bele ejerse sira nia direitu politika ho livre no demokratiku. Maibé parte sira neébé sei sai preokupasaun ba eleitores hanesan kabina de votasaun, no eletrisidade, ida ne,e kompetensia CNE no STAE nian, nune,e iha futuru bele hadia kestaun sira ne,e.
Presiza Informasaun Kontaktu Lady Ximenes, TP Relasaun Públika PDHJ Telemovel 7304260 ou Jóse Tefa 735 1412 ou 3331071.