PDHJ Aprezenta Relatoriu Anual 2018 Iha Plenaria PN

Dili : 2 Jullu 2019, Provedora, Jesuina Maria Ferreira Gomes, MPA, Provedor Adjunto Boa Governação, Dr. Miguel Pereira de Carvalho, Provedor Adjunta Direitos Humanos, Sra. Benícia Eriana Magno, Secretario Executivu, Chefe Gabinete, Inspetor interino no Diretores marka prezensa iha plenaria aprejenta relatoriu annual tinan 2018 ba destintus Deputados Parlamentu Nacional.
Iha plenaria, Provedora aprezenta atividades importante 4 mak hanesan, 1. asegura autoridade públiku sira iha kunesementun kona ba prinsipiu direitu umanus no boa governasaun. Rezultadu ne’ebé mak atinzi iha parte promosaun ni’an. 2. garante katak autoridade sira realiza duni prevenaun no koresaun violasoens hasoru prinsipius direitus umanus no boa governasaun. 3. ema vulneravel sira iha protesaun hasoru abuzu direitus umanus no bele hetan asesu diak ba atendimentu. 4. asegura kapasidade no independensia PDHJ hodi garante PDHJ bele implementa programa ho dia’k.
Entretantu Provedora mós hato’o agradese wain ba deputadus sira ne’ebé kongratula ho servisu PDHJ ni’an ne’ebé konege atinzi ona progresu lubuk ida. PDHJ mós senti kontenti ho aprejentasaun relatoriu annual ba tinan ida ne’e tanba, kuaze deputadus sira ativu hotu hodi halo perguntas no sujestaun ba iha PDHJ.
“Agradese tebes tanba aprejentasaun PDHJ ni’an ba tinan ida ne’e maioria deputadus sira ativu hotu ho perguntas no sujestaun ne’ebé atinzi Haat nulu resin,”dehan Provedora Jesuina M. Fereira Gomes, iha aprejentasaun plenaria iha Parlamentu Nacional. (Tersa, 02 Jullu 2019).
Nia dehan, ida ne’e hatudu katak durante ne’e deputadus sira mós akompaña no halo hela kontrola ba iha servisu PDHJ ni’an.
Maske nune’e, deputadus sira mós apela ba iha PDHJ atu kontinua mantein servisu ne’ebé dia’k hodi asegura diretus umanus no boa governasaun ne’ebé dia’k iha rai doben Timor leste.
Iha fatin hanean deputada Veneranda Lemos liu husi plenaria haktuir, nia kongratula ho servisu no estrutura PDHJ ne’ebé, iha balansu Jeneru maibe, husu ba PDHJ atu nafatin tau kestaun igualdade Jeneru hanesan asuntu importante.
Plenaria Parlamentu nacional ne’e lidera husi Dra. Maria A. Lopes Sarmento ou Prezidente em ezercicio.