• PDHJ Asina MoU- ATSH ho Instituisaun Privadu no Publiku Iha Jakarta

    Jakarta : Provedoria dos Direitos Humanos e Justiça (PDHJ) núdar Instituisaun Independente ho nia kompetensia atu simu keixas husi sidadaun hasoru poderes públiku, halo investigasaun, halo mediasaun, konsiliasaun no halo fiskalizasaun no monitorizasaun.

    Iha loron 28 no loron 29 Maiu 2019, Provedora de Direitus Humanus no Justisa, Jesuina Maria Ferreira Gomes, MPA hamutuk ho Diretores sira husi Intituisaun Privadu mak hanesan Yayasan Pendidikan Internal Audit (YPIA), Universidade Indonesia (UI) no Yayasan Inovasi Manajemen Publik (YIMP) no Instituisaun Publiku mak hanesan Komisi Nasional Hak Asasi Manusia (Komnas HAM) Republik Indonesia asina Memorandum of Understanding (MoU) no asina Akordu Tekniku Servisu Hamutuk (ATSH) iha Jakarta-Indonesia.

    Iha loron 28 Maiu 2019, parte dader, Provedora, Jesuina Maria Ferreira Gomes, MPA no Diretur Executivu Yayasan Pendidikan Internal Audit (YPIA), Drs. Poedjiono asina Akordu Tekniku Servisu Hamutuk (ATSH) iha sala YPIA Jakarta-Indonesia.

    No parte loraik, Provedora no Wakil Ketua Komnas HAM Bidang Eksternal, Ibu. Sandrayati Moniaga no funsionárius sira iha Komnas HAM no ekipa husi PDHJ realiza uluk evaluasaun ba atividades ne’ebé durante servisu hamutuk entre PDHJ no Komnas HAM durante tinan hirak ba kotuk. Ho objetivu atu hare hikas atividades ne’ebé realiza ona no mos atividade ne’ebé seidauk realiza.

    Depaois enkontru evaluasaun, Provedora, Jesuina Maria Ferreira Gomes, MPA no Ketua Komisi Nasional Hak Asasi Manusia (Komnas HAM), Ahmad Taufan Damanik, asina hikas Memorandum of Understanding (MoU) foun hodi kontinua servisu hamutuk iha área treinamentu no monitorizasun.

    Entre tantu iha loron 29 Maiu 2019 parte dader no laraik kontinua asina Akordu Tekniku Servisu Hamutuk ho Universitas Indonesia (UI) no Yayasan Inovasi Manajemen Publik (YIMP) iha sira nia fatin ida-idak.

    Provedora, Jesuina Maria Ferreira Gomes, MPA iha nia intervensaun hateten katak, atividade asina Akordu Tekniku Servisu Hamutuk (ATSH) no asina Memorandum of Understanding (MoU) ho instituisaun Publiku no Instituisaun Privadu hanesan atividade renovasaun ba MoU sira ne’ebé iha tinan hirak liu asina ona.

    Provedora esplika katak, objetivu husi asina Akordu Tekniku Servisu Hamutuk no MoU ne’e, atu fó kapasitasaun no hasa’e koñesimentu funsionáriu PDHJ nian iha área “Auditorial Internal, Investigasaun, Mediasaun, Legal Drafting, Metodologi Penelitian Analisis Data dan Elaborasi Laporan no Monitorizasaun”

    Provedora hatutan katak, tuir planu sei realiza treinamentu ne’e iha fulan Jullu no fulan Setembru maibé ita espera katak, ho orariu ne’ebé determina la iha mudansa husi parte rua ne’e.

    Provedora hanesan responsabel jeral Instituisaun nian, husu ba fasilitadores sira husi YPIA, UI, Komnas HAM no YIMP atu kapasita funsionáriu sira ne’ebé mai tuir treinamentu ne’e ho esperitu matenek ne’ebé fasilitadores sira iha, atu nune’e wainhira funsionáriu sira remata formasaun ne’e, bele hetan koñesimentu naton no implementa iha Instituisaun.

    “Hau fiar katak ho esperitu matenek ne’ebé formandus sira iha bele partilha ba hau nia funsionárius sira ne’ebé mai tuir kapasitasaun iha ne’e, atu nune’e depois fila fali ba sevisu fatin sira bele implementa”, espera Provedora.

    Atividade asina Akordu Tekniku Servisu Hamutuk no asina MoU ne’e, akompaña husi Reprezentante Embaixador RDTL iha Jakarta-Indonesia, Sra. Esmelia Guterres no Sr. Rui Mendonça, ekipa husi PDHJ no mos funsionárius sira Instituisaun Yayasan Pendidikan Internal Audit (YPIA), Komnas HAM, Universitas Indonesia (UI) no Yayasan Inovasi Manajemen Publika (YIMP).

Comments are closed.