Baucau : Durante loron 2 hahu husi loron 30-31 Jullu 2019, Instituisaun 4 kompostu husi Provedoria dos Direitos Humanos e Justiça (PDHJ), Komisaun Anti Korupsaun (KAK) Inspesaun Jeral Estadu (IJE) no Komisaun Funsaun Publika (KFP) hala’o atividade workshop diseminasaun ba Funsionáriu Públiku linhas Ministerial iha Munisipiu Baucau.
Atividade ne’e ho tema “Prevene no Kombate Korupsaun, hodi Promove Governasaun Di’ak no Proteje Direitus Umanus iha Servisu Administrasaun Públika”.
Provedora, Jesuina Maria Ferreira Gomes, MPA iha abertura ba atividade workshop ne’e hateten katak, atividade workshop ba Funsionário Públiku iha Munisipiu Baucau ho nia objetivu atu partilha informasaun kona-ba governasaun di’ak iha servisu administrasaun públika.
Provedora hatutan katak, funsaun publika hanesan servisu ida ne’ebé governu halo ba sidadaun sira ka ema bolu dehan prestasaun servisu ne’ebé governu halo ba públiku, halo ba komunidade, halo ba sidadaun liu husi Funsionáru Públiku no Ajente Administrasaun Publika.
“Ita mos rona lia fuan dehan, administrasaun publika ne’e mak implementa politika governu nian liu husi kriasaun programa, atividade no planu, atu atende sidadaun sira ba nia bens star liu husi funsionáriu públiku no ajente administrasaun publika”.
Provedor hatutan, funsionáriu públiku no ajente administrasaun publika hanesan reprezentante estadu nian, atu implementa governu nia politika, wainhira temi governu, laos Primeiru Ministro, Governo no Diretur Jeral deit maibé sistema ida tomak ne’ebé reprezenta governu atu fó prestasaun servisu ba ita nia sidadaun sira.
“Sei ita mak reprezentante governu, entaun governu kria kondisaun oi-oin ba ita para ita halo ita nia servisu ho diak, kondisaun ida mak bolu hanesan formasaun, formasaun bele liu husi meius treinamentu, workshop no semináriu”, esplika Provedora.
Entretantu, iha sesaun aprezentasaun matéria, Provedora, Jesuina Maria Ferreira Gomes, MPA, esplika papel Provedoria nian mak hanesan baze legal instituisaun, visaun no misaun, prinsipius governasaun dia’k no kategoria violasaun boa governasaun ba funsionáriu públiku no ajente administrasaun publika iha Munisipiu Baucau.
Iha fatin hanesan, Prezidente Autoridade Munisipal Baucau, Dr. António Augosto Guteres, orguilhu tebes ho prezensa husi lider maxímu husi instituisaun mak hanesan PDHJ, KAK, IJE no KFP hodi realiza atividade workshop durante loron 2 iha Munisipiu Baucau atu motiva nafatin hodi lao tuir koridor servisu estadu nian.
Prezidente husu ba partisipantes hotu atu tuir no rona diak esplikasaun materia husi oradores sira kona-ba asuntu governasaun di’ak iha servisu administrasaun publika, atu nune’e bele sai hanesan bukae ida ba ida-idak nian, hodi implementa iha servisu fatin.
“Hau fiar katak, partisipantes iha eventu importante ne’e mesak Funsionáriu Públiku ne’ebé asumi knár núdar Diretores no Xefia iha administrasaun publika nian, no oinsa atu kuidadu servisu hirak ne’ebé atribui tiha ona ba ida-idak nia knár hanesan servisu estadu iha sétor ida-idak nian, tantu servisu iha Ministério Agrikultura, Ministério Edukasaun, no Ministério Saúde no mos ida ne’ebé hala’o administrasaun husi nivel nasional ba to’o nivel aldeia, atu nune’e populasaun sira senti duni ita nia atendimentu diak ka lae? ”, dehan Prezidente.