• Uza web-site

    PDHJ, CAC, IJE no KFP Disemina Knár ba FP Munisipiu Bobonaro

    Maliana : Durante loron 2 hahu husi loron 11 to’o 12 Junhu 2019, Instituisaun 4 kompostu husi Provedoria dos Direitos Humanos e Justiça (PDHJ), Komisaun Anti Korrupsaun (KAK), Komisaun Funsaun Publika (KFP) no Inspetor Jeral Estado (IJE), realiza atividade workshop ba funsionáriu públiku iha Munisipio Bobonaro.

    Ho tema “Prevene no Kombate Korupsaun, hodi Promove Governasaun Di’ak no Proteje Direitus Umanus iha servisu Administrasaun Públiku”.

    Provedora, Jesuina Maria Ferreira Gomes, MPA iha abertura hateten katak, atividade workshop ba Funsionário Públiku iha Munisipio Bobonaro ho nia objetivu atu partilha informasaun kona-ba boa governasaun ne’ebé sei kompostu husi servisu PDHJ, CAC, IJE no KFP. Oportunidade hanesan ne’e, importante tebes tanba instituisaun 4 ne’ebé servisu atu promove boa governasaun hamutuk ho ita bo’ot sira iha fatin ne’e, atu partilha informasaun kona-ba asuntu boa governasaun. Objetivu seluk mak atu hasa’e koñesimentu funsionáriu sira nian, dala ruma funsionáriu balun hatene ona kona-ba servisu husi instituisaun 4 ne’e maibé seidauk kompletu karik ou dala ruma funsionáriu balun mos seidauk hatene servisu husi instituisaun 4 ne’e karik, tanba violasaun hasoru boa governasaun komete husi funsionáriu no ajente sira.

    Provedor hatutan katak, dala ruma funsionáriu sira hatene maibé ignora tiha ou dala ruma mos falta de koñesimentu tanba la hatene duni. Tanba ne’e mak instituisaun 4 organiza atividade workshop ne’e, atu partilha informasaun kona-ba lei, liu-liu liga ho funsaun publika nian ba funsionário sira atu hasa’e koñesimentu, atu nune’e fasílita funsionáriu sira nia servisu atu la’o ho diak, promove prinsipius boa governasaun no atu fó atendimentu ne’ebé diak ba ita nia komunidade sira.

    Entretantu, iha sesaun aprezentasaun matéria, Provedora, Jesuina Maria Ferreira Gomes, MPA, esplika papel Provedoria nian mak hanesan baze legal instituisaun, visaun no misaun, prinsipius boa governasaun no kategoria violasaun boa governasaun ba funsionáriu públiku no ajente administrasaun publika iha Munisipiu Bobonaro.

    Iha fatin hanesan, Reprezentante Prezidente Autoridade Munisipiu Bobonaro atual Secretário Executivu Autoridade, Sr. Julio Carvalho Caeiro orgulhu tebes ba programa husi instituisaun PDHJ, CAC, IJE no KFP ne’ebé mai to’o iha ami nia fatin hodi disemina informasaun kona-ba papel husi instituisaun ida-idak ba ami nia funsionáriu sira iha Munisipiu Bobonaro. Secretario Executivo husu ba funsionáriu sira ne’ebé partisipa atividade ne’e, atu partisipa ho maximu hodi nune’e bele hatene klean kona-ba servisu husi instituisaun ida-idak, tanba durante ne’e dala barak ita akompaña deit liu husi televisaun deit maibé ita dala ruma seidauk hatene klean kona-ba servisu husi instituisaun 4 ne’e.

Comments are closed.