• PDHJ entrega 27 rekomendasoens ba órgauns kompetentes

    Data, 30-04-2010

    Iha loron 30 Abril 2010,  Provedoria dos Direitos Humanos (PDHJ) entrega  27 rekomendasoens ba orgauns kompetentes. Iha rekomendasaun 9 kona-ba indicios KKN, 11 kona-ba mal administrasaun no rekomendasaun 7 kona-ba indicios violasaun direitos humanos. Kazus sira ne’e balun simu iha tinan 2008 no balun simu iha tinan 2009.

    Dr. Sebastião Dias Ximenes, Provedor hateten “iha prosesu investigasaun ne’e ekipa rekolla dokumentus no informasaun liu husi konvokatoria husu Dokumentu ho halo Audiênsia. Prosesu investigasaun ne’e lori tempu oituan tanba atu investiga keixas kna-ba indicios KKN laós fasil. Dala ruma la iha kooperasaun di’ak husi instituisaun balun atu fornese dokumentus ne’ebé PDHJ presiza”.  

    “Tuir rekomendasaun ne’ebé PDHJ hato’o relasiona ho kazus ne’ebé iha alegasaun tenderizasaun la trasparente, , la iha transparensia iha prosesu ezekusaun orsamentu ne’ebé doadu husi governu ba komunidade Musulmana, Manipulasaun orsamentu FDC, la iha transparensia iha orsamentu FDC, iregularidades abuzu de poder iha kontratu sosa kareta 65 ba Parlamentu Nasional.  ” hateten Provedor.

    “Nune’e mós indikasaun kona-ba Mal gestaun no indsius KKN iha prosesu hola ekipamentu (fardas no botas ba Guardas Prizionais Timor-Leste, Mal gestaun iha prosesu rehabilitasaun estrada faze primeiru no segundu iha Lospalos, iregularidade iha prosesu tenderizasaun fornesimentu mina ba EDTL Dili, irregularidades no indisius de korrupasaun iha distribuisaun mina Gasoel EDTL ba distrito Covalima, mal gestaun iha prosesu rehabilitasaun eskolas iha distritu Viqueque, mal gestaun iha utilizasaun fundu emergensia, rancho no MOP ba Guardas Prizionais Gleno, hatutan Provedor.

     Liu tan Provedor esklarese  “liu husi rekomendasaun ne’e Provedor husu ba Ministeriu kompetentes atu bele implementa rekomendasaun hirak ne’e tuir lei ne’ebé iha”.

    Tuir Estatutu Provedor, Lei No. 7/2004, Artigu 47 pontu 1 ne’ebé hatete katak Provedor Direitus Humanus no Justisa tenke identifika kauzas kona-ba violasaun direitus humanus, abuzu de poder, jestaun la di’ak, fraude, korrupsaun no tráfiku de influénsia iha entidade públiku ida, no hato’o lia-menon sira ba korresaun, prevensaun ka halakon no ba hala’o observansia ba padraun sira ne’ebé a’as liu hotu kona-ba direitus humanus nian, prinsípiu legalidade, étika no efisiénsia nian. Artigu 47 pontu 2 kona-ba  Lia-menon sira ne’ebé Provedor Direitus Humanus no Justisa  nian hala’o ne’e, sei hato’o ba órgaun ne’ebé iha kbi’it atu halo korresaun ka hadi’a aktu situasaun ida be la’os bai-bain nian.

    Bazeia mós ba Artigu 47 pontu 3 no 4 ne’ebé hatete katak Órgaun ida ne’ebé simu lia-menon ne’e, tenke hato’o informasaun ba Provedor Direitus Humanus no Justisa nian kona-ba sasukat sira ne’ebé foti atu kumpri ka hala’o lia-menon sira ne’ebé hatada ona ne’e, iha loron ne’en nulu (60) nia laran. Bainhira la kumpri ka la hala’o lia-menon ne’e, Provedor Direitus Humanus no Justisa nian bele hato’o hahalok ida ne’e ba Parlamentu Nasional.

    Ikus liu Dr. Sebastião husu ba órgauns sira ne’ebé simu rekomendasoens sira ne’e atu iha konsiderasaun seriu ba rekomendasoens no foti medidas no asoens konkretas iha nia implementasaun.

    Persiza informasaun Kontaktu

    Lady Ximenes

    Informasaun & Relasaun Públika PDHJ

    Telemovel 7304260 ou 333 1071