PDHJ Entrega Relatoriu Anual 2016 Ba PN

Dili : Dili : Iha loron 11 Jullu 2017, Provedor Dr. Silvério Pinto Baptista akompaña husi Adjunta Provedor ba área Governasaun Di’ak, Jesuina Maria Ferreira Gomes, MPA, Adjunto Provedor ba área Direitus Umanus Dr. Horacio de Almeida no Xefi Gabinete Provedor Sr. Silvinho Saldanha Pereira entrega no aprezenta pontos prinsipal servisu Provedoria iha tinan 2016 nian ba Prezidente Parlamento Nasional Dr. Aderito Hugu da Costa.

Iha aprezentasaun ba relatoriu ne’e, Provedor aprezenta pontus importante sira ne’ebé mak iha relasaun ho servisu tomak Provedoria nian durante iha tinan 2016 nia laran.

“relatoriu ne’e atu fo dezenha de’it katak, aktividades ne’ebé maka ami halo bazeia ba planu estratejiku ne’ebé mak hatun ba iha planu anual i kada aktividades sei ezekuta husi kada diresaun ne’ebé maka ami estabelese iha Provedoria bazeia ba ami nia lei organiku ne’ebé iha,” hateten, Provedor.

Provedor hatutan, aktividades sira ne’e maka hanesan investigasaun, promosaun, fiskalizasaun, simu keixa, mediasaun konsiliasaun no monitoriza rekomendasaun PDHJ inklui aktividade balun ne’ebé mak liga ho kapasitasaun institusional.

Aleinde ne’e Provedoria mós prontu nafatin bainhira Parlamentu hakarak fó oportunidade atu Provedoria bele aprezenta relatoriu anual ne’e iha plenaria.

Iha fatin hanesan, Prezidente Parlamentu Nasional Dr. Aderito Hugo da Costa haktuir, durante ne’e sira mós akompaña hela prosesu servisu tomak ne’ebé mak lao iha Provedoria nia laran no Parlamentu mós apresia ho ekipa monitoring PDHJ nian iha terenu ne’ebé mak hatudu duni sira nia vontade de servisu.

Kona-ba aprezentasaun relatoriu anual iha plenaria, Prezidente la promete maibe, sira sei tenta buka tempu oinsa para antes remata mandatu Provedor ho ekipa bele aprezenta relatoriu anual ne’e iha plenaria.

Prezidente mós husu nafatin ba Provedor atu tau matan ba institituisaun estadu ka governu tuir Provedoria nia mandatu ne’ebé romove governasaun diak hodi proteje direitus umanus.