PDHJ entrega relatoriu monitorizasaun EA ba autoridade RAEOA
RAEOA – Iha loron 31 Jullu 2018, Provedoria dos Direitos Humanos e Justiça (PDHJ) entrega relatoriu monitorizasaun eleisaun antesipada (EA) ba Autoridade Rejiaun Administrativa Espesial Oe-cusse (RAEOA) iha salaun Administrasaun RAEOA-Numbei.
Provedor Dr. Silvério Pinto Baptista iha nia intervensaun hateten katak, iha ámbitu mandatu konstitusional ne’ebé temi katak, PDHJ hala’o atividade fiskalizasaun tuir artigu 24 husi Estatutu Provedoria Lei nú: 7/2004 no artigu 8 husi Dekretu Lei nú: 31/2016 kona-ba Orgánika Provedoria Direitus Umanus no Justisa. Fiskalizasaun sai hanesan atividade ida ne’ebé PDHJ hala’o regularmente no ho inisiativa Provedor Direitus Umanus no Justisa nian.
“Tanba neé, bazeia ba artigu 35o Estatutu Provedoria nian, Provedór Direitus Humanus no Justisa toma inisiativa atu monitoriza kampaña no eleisaun lejislativa antesipada tinan 2018 ho objetivu atu prevene violasaun liberdade sirkulasaun durante kampaña, iha tempu eleisaun no pós eleisaun; violasaun tratamentu aát husi autoridades no kandidatura sira; prevene violasaun tratamentu aát ka krime nebeé involve uza forsa durante kampaña kandidatura, iha tempu eleisaun no depoiz de eleisaun nebeé akontese iha teritóriu laran tomak iha Timor-Leste; prevene autoridade públika nebeé la ho autorizasaun uza patrimóniu Estadu ba iha kampaña, eleisaun no envolvimentu funsionáriu sira iha kampaña,” hateten Provedor depois entrega relatoriu ba autoridade sira iha RAEOA.
Provedor hatutan, relatoriu ne’e relata kona-ba identifikasaun funsionariu publika, labarik inklui uza patrimonia estadu durante kampaña no eleisaun antesipada no husi identifikasaun ne’e, PDHJ halo rekomendasaun ba autoridade RAEOA liu-liu Sekretariu Rejiuan Administrasaun atu bele hola medidas ba aktus sira ne’ebé PDHJ identifika.
“Hafoin intrega relatoriu ne’ebé ho nia dadus sira ne’e, ita kontinua follow up nafatin ita nia rekomendasaun sira ne’e hodi hatene autoridade RAEOA hola ona medidas ka lae ba aktu sira ne’ebé PDHJ identifika, tanba ita hakarak promove boa governasaun inklui evita violasaun direitus umanus iha RAEOA,” esplika Provedor.
Iha fatin hanesan, Sekretariu Rejiuan ba asuntu Administrasaun Dr. Francisco Xavier Marques hateten, relatoriu ne’e hanesan lalenok ba autoridade RAEOA hodi bele hare failansu ne’ebé akontese iha RAEOA durante kampanha eleisaun antesipada.
“Ami sei hare lai relatoriu ne’e, tanba sira temi jeral deit, la fokus ba RAEOA kona-ba boa governasaun ho violasaun direitus umanus, maibe ita mos nafatin tau atensaun ba ita nia funsionariu sira iha RAEOA para la bele komete aktu sira ne’e”, dehan Francisco.
Sekretariu ne’e, espera katak ba oin RAEOA sei kontinua hametin koperasaun diak ho PDHJ atu promove boa governasaun no evita kazu violasaun direitus humanus, RAEOA mos iha nia politika ne’ebé hakarak promove boa governasaun.
Iha serimonia ne’e, hetan partisipasaun husi Administrador Sub-Rejiaun hat iha RAEOA hanesan Oe-silo, Passabe, Nitibe no Pante Makasar, Komandante PNTL RAEOA no mos sosiadade sivil.