• PDHJ – Estados Unidos da Amerika-New Zealand Lansa Programa G2G

    Dili – Provedoria dos Direitos Humanos e Justiça (PDHJ) nudar Instituisaun Nasional Direitus Humanus ne’ebé iha kna’ar importante hodi protéjé  no promove  direitus humanos no promove governasaun di’ak. Tanba ne’e, iha loron loron 26 Outubro 2015  ofisialmente lansa programa  Governo ba Governo (G2G) ne’ebé hanaran “Sthrengthening Desentralization in The Office of the Ombudsman for Human Rights and Justice Phase II project”.

    Dr. Silverio Pinto Baptista, Provedor iha nia palestra hateten, programa ne’e hanesan programa kontinuasaun husi programa primeiru ne’ebé realiza tiha ona iha tinan kotuk ne’ebé hetan suporta husi Estadus Unidos de Amerika maibe ba tinan ida ne’e hamutuk tan ho Governo New Zealand.

    Provedor mos informa ba partisipantes sira katak, orsamentu ne’ebé hetan husi Governo New Zealand no Estados Unidos de Amerika sei uteliza ba atividade sosializasaun ba kna’ar PDHJ nian iha Munisipius hotu no mos sei uza hodi kapasita funsionarius PDHJ nian iha Regional 4 mak Regional Baucau, Manufahi, Bobonaro no Oe-cusse, atu nune’e sira bele hala’o sira nia servisu tuir prosedementu PDHJ nian, liu liu liga ba sira nia servisu hanesan, monitorizasaun, sosializasaun no investigasun.

    Provedor hatutan katak, orsamentu ne’ebé  nasaun rua ne’e apoio ba PDHJ hamautuk, U$. 523,443 no husi total ne’e, Estados de Amerika nian hamutuk U$. 200.000 no Governo New Zealand hamutuk U$.323,443. No husi orsamentu ne’ebé apoiu husi Guoverno rai rua ne’e sei tau prioridade liu ba funsionáriu sira husi Rejional 4.

    Provedor mos informa katak, programa PDHJ nian sai hanesan programa integradu ba Instituisaun governo hanesan PDHJ, IJE, KAK no KFP bazeia ba akordu ne’ebé asina iha semana kotuk.

    Ih fatin hanesan, Embaixador New Zealand ba Timor-Leste, Jonathan Schwass informa katak, New Zealand servisu hamutuk ho PDHJ komesa iha tinan 2007 tamba Timor-Leste mak parseiro New  Zealand nian nomos PDHJ hanesan instituisaun ne’ebé asumi  kna’ar  bo’ot  tebes hodi proteze direitus humanus no promove governasaun di’ak, nune’e  New Zealand hakarak suporta hodi hametin relasaun entre Guverno Timor Leste ho New Zealand.

    Entertantu reprezentante Embaixador Estados Unidos da Amerika (EUA) ba Timor-Leste Katharine Dueholm hateten, Provedoria dos Direitos Humanos e Justiça nia servisu importante tebes iha area direitus humanus no governasaun di’ak.

    Katharine Dueholm hatutan, Estados Unidos de Amerika laos deit mak foin atu ajuda PDHJ maibe iha tinan rua liu ba ajuda tiha ona hodi dezenvolve PDHJ liu husi nia Diresaau Boa Governasaun iha Departamentu Monitorizasaun no Departamentu Investigasaun. No agora dadaun ne’e Governo New Zealand hamutuk ho Estadu Unidos de Amerika, servisu makas hodi suporta PDHJ atu luta kontra violasaun direitus humanus iha nasaun foun Timor-Leste.

Comments are closed.