• PDHJ Fasilita Treinamentu ba Treinador F-FDTL No Ofisial PDHJ Hamutuk Na’in 22 Kona-ba Manual Direitus Umanus

    Dili : Iha loron 5 fulan Junho 2017, liu husi koperasaun serbisu entre Provedoria dos Direitos Humanos e Justiça (PDHJ), Falintil Forsa Defeza Timor-Leste (F-FDTL), Ministério Defeza (MD), inklui observador husi ONG Fundasaun Mahein (FM) no hetan tulun husi Unidade Assesoria Direitus Umanus ONU iha Timor-Leste realiza programa treinamentu ba treinador F-FDTL, Ministério Defeza no Provedoria hamutuk na’in 22.

    Iha abertura Provedor Provedoria Diretus Umanus no Justisa Dr. Silverio Pinto Baptista hateten katak, objetivu husi treinamentu ne’e atu ofisial sira bele iha koñesimentu kona-ba dever estadu atu respeita, proteze, no realiza direitus umanus. No treinamentu ne’e mós atu familiariza konteudu manual direitus umanus ba ofisial sira, bele espresa sira nia pensamentu, suzestaun, komentarius hodi bele kompleta manual ne’e iha faze final.

    Provedor hatutan katak, treinamentu ne’e mós sei hamosu konfiansa no abilidade ba treinadores sira atu bele sai fasilitador ba treinamentu sira iha futuru kona-ba direitus umanus liu husi manual ida ne’e.

    “atu minimiza atus ne’ebé viola direitus umanus iha futuru, estadu Timor-Leste sei kontinua esforsa án hodi mellora kualidade ofisial PNTL no F-FDTL sira nian, nuneé sira mantein no respeita leis no regulamentus ne’ebé vigora iha Timor-Leste hodi bele hala’o sira nia papel ho profisional no tuir regras internasional, nuneé nesesáriu tebes kontinua kapasitasaun ba ofisial PNTL no F-FDTL konaba ba uzu de forsa no respeitu ba prinsípius internasional sira”. dehan Provedor iha nia abertura.

    Iha fatin hanesan, Vice Chefe Estado Maior General F-FDTL, Sr. Filomeno Paixão de Jesus husu ba ofisiais F-FDTL sira ne’ebé partisipa treinamentu ne’e atu partisipa ho maximu hodi nune’e bele kompriende didiak kontiudu husi manual ne’e rasik, atu nune’e iha futuru bele aplika manual ho diak iha Instituisaun F-FDTL ne’e ho diak.

    Brigadeiru hatutan katak, treinaamntu ne’e importante tebes ba ofisiais F-FDTL sira atu partisipa ho masimu, tanba hanesan forsa labele hatene de’it halo atuasaun ba ema maibe, presiza mós iha edukasaun ne’ebé masimu kona-ba saida mak direitus umanus.