• Ba website

    PDHJ Fasilita Treinamentu Governasaun Di’ak Ba Funsionariu Saúde Baucau

    Baucau- Provedoria Direitos Humanos no Justica, Diresaun Nasional Boa-Governasaun hala’o treinamentu ba funsionariu públiku sira iha area saúde iha Munisipiu Baucau hahu iha loron 1-3 Jullu 2015 iha salaun enkontru PDHJ Regional Baucau.

    Treinamentu refere  hala’o tamba servisu hamutuk entre PDHJ, Ministeriu Saúde (MS) no Inspesaun Geral do Estadu (IGE) ho objetivu hodi kapasita no hasa’e koñesimentu funsionalizmu públiku iha aréa edukasaun, hodi promove governasaun di’ak.

    Iha sesaun abertura Sr. Francisco de Carvalho, Inspektur Geral Estadu ne’ebé reprezenta instituisaun tolu, PDHJ, MS no IGE hato’o agradesimentu ba partisipante sira-nia partisipasaun iha treinamentu refere. Tamba ho treinamentu ne’e bele aumenta koñesimentu funsionariu sira-nian iha area saúde Munisipiu Baucau atu nune’e bele promove governasaun di’ak.

    Jose Manuel Ferreira, Diretur Boa-Governasaun PDHJ, hato’o katak PDHJ iha knaar promove no proteje direitus umanus no promove governasaun di’ak. Nune’e funsionariu estadu presiza hala’o kna’ar tuir prosedimentus legais hodi bele promove governasaun di’ak iha Timor Leste.

    Ferreira hatutan, nu’udar funsionariu públiku iha dever hodi hala’o knaar tuir prinsipiu governasaun di’ak, maka hanesan partisipasaun, akontabilidade, transparensia, hari’i justisa, igualdade, efisiensia no efikasia kontrolu, responsive, vizaun prespetiva no profesionalizmu. Importante tebes funsionariu públiku sira atu implementa ka aplika prinsipiu sira ne’e iha servisu fatin, atu nune’e bele evita hamosu irregularidade.

    Partispante sira maka partisipa iha treinamentu, hamutuk ema nain 33, feto ema nain 11 no mane 22 husi Postu Administrativu, Baucau Vila, Quelicai, Laga, Vemasse, Baguia no Venilale. Tuir observasaun PDHJ katak ho métodu treinamentu ne’ebé fasilitador sira uza mak métodu partisipativu, nune’e partisipante sira antusiasmu tebes hodi partisipa iha treinamentu referee.

    Bazeia ba Konstituisaun Repúblika Demokrátika Timor Leste (RDTL) Provedoria dos Direitos Humanos no Justisa, nu’udar órgaun Independenti  ida ne’ebé  iha kna’ar atu hare’e no buka hatán sidadaun sira nia keixas hasoru poderes publiku, atu hare’e lolo’os hahalok sira ne’ebé tuir lei no halo prevensaun no hahu prosesu tomak hodi haburas fila fali Justisa.

Comments are closed.