• PDHJ Fó Premiu Direitus Umanus Ba PNTL Munisipiu Liquiça

    Bobonaro – Selebrasaun loron internasional direitos umanus loron 10 Dezembru ba dala 67, PDHJ selebra hamutuk ho komunidade sira iha Suco Batugade, Posto Administrativo Balibo Munisipiu Bobonaro. Iha selebrasaun ne’e, PDHJ fó premio direitos umanus ba PNTL husi Esquadra Munisipiu Liquiça kona-ba PNTL sira nia prestasaun servisu durante tinan ida nia laran. Dr. Horacio de Almeida, Provedor Adjunto ba area direitos umanus hateten katak, kriteria hodi fó premio direitos umanus ba PNTL husi Esquadra Munisipiu Liquiça tanba durante tinan ida nia laran hahu husi loron 1 Fulan Novembru tinan 2014 toó loron 1 Fulan Novembru 2015 keixa husi komunidade sira kona-ba indikasaun violasaun direitus umanos hasoru membrus PNTL husi Esquadra Munisipiu Liquiça menus liu kompara ho Munisipius seluk. Provedor Adjunto ba area direitos umanus ne’e hatutan, liu husi premio direitos umanus ne’e nudar meus ida hodi fó motivasaun ba membrus PNTL iha Munisipiu Liquiça no membrus PNTL iha Munisipiu sira seluk hodi bele serbi diák liu tan komunidade sira ho profesional tuir lei no ordem mak iha. Iha fatin hanesan, Segundu Komandante PNTL Munisipiu Liquiça, Supedentendenti Assistente Eduardu Campos reprezenta Komandante PNTL Munisipiu Liquiça sente urgullu ba premiu refere tanba bele fó motivasaun ba sira atu bele serbi diák liu tan povo no nasaun ida ne’e. Segundu Komandante reforsa tan katak, misaun ne’ebé sira hala’o tuir konstituisaun RDTL artigo 147 alinea 2 hateten katak, atu halo prevensaun ba krime tenki respeitu ba direitus umanus atu nune’e bele promove paz no estabilidade iha Munisipiu rasik no mos iha rai doben Timor Leste. Segundu Komandante ne’e mos, fó korajen nafatin ba ema hotu nudar Timor oan atu hamutuk hodi promove direitus umanus ba futuru, atu nune’e, ita bele tane a’as valor direitus umanus no dignidade nudar cidadaun Timor oan, tanba ita hotu mesak Timor oan deit, sei la’os ita sei mak atu promove direitus umanus no sei la’os agora bainhira fali.