pdhj hakbi’it kapasidade iha area diskriminasaun
Date : 4-10-2011
Dili – Funsionariu Provedoria dos Direitos Humanus no Justisa (PDHJ) no reprezentantes husi Organizasaun Naun Governamental (ONG) ne’ebe servisu iha area direitus umanus partisipa treinamentu kona-ba Analisa Direitus Umanus ba Diskriminasaun durante loron 3 hahu husi loron 3 to’o 5 Outubru 2011 iha Hotel Vila Verde-Dili.
Objetivu husi treinamentu ne’e, atu hasa’e koñesimentu iha area diskriminasaun liu-liu atu halo analiza kona-ba kazu diskriminasaun tuir standar direitus humanus nasional no internasional.
Adjunto Provedor ba area direitus humanus, Dr. Silverio Pinto Baptista hateten katak, ho treinamentu ne’e bele aumenta no hasa’e koñesimentu klean kona-ba diskriminasaun, tamba hanesan nasaun foun Timor-Leste mos ratifika ona konvensaun internasional 7 liu-liu konaba konvensaun internasional eliminasaun ba diskriminasaun kontra feto (CEDAW).
Treinador ba treinamentu Sr. Peter Hosking ne’ebe iha esperensia makas ba area diskriminasaun, PDHJ konsidera treinamentu ne’e importante tebes liu-liu ba ofisial sira mak servisu iha area direitus umanus, atu nune’e sira iha koñesimentu diak kona-ba diskriminasaun. Tamba treinador ne’e iha esperensia barak kona-ba area refere. Hateten Adjuntu Provedor Silverio.
Adjuntu Provedor mos informa ba partisipantes sira katak, treinamentu durante loron 3 ne’e laos ikus ona maibe sei kontinua iha tinan oin mai, nomos husu ba partisipantes sira hodi aproveta oportunidade ne’e atu hetan buat furak ruma liu husi materia ne’ebe hato’o husi treinador.
Ho treinamentu ne’ebe ho tempu limitadu tebes maibe espera katak bele aumenta ofisial sira ne’ebe servisu iha area direitus umanus atu apoiu servisu wainhira halo investigasaun no monitorizasaun ba kazu diskriminasaun iha rai laran.
Treinamentu ne’e realiza durante loron 3 hetan apoiu husi projetu UNDP/OHCHR ba PDHJ kona-ba Hasa’e Kapasidade ba Provedoria Direitos Humanos no Justisa (PDHJ).