pdhj hala’o servisu movel iha oecuse
Data, 24-01-2011
Provedor de Direitos Humanos e Justiça (PDHJ) hala’o servisu movel iha enklave oecuse hanesan iha Oesilo, Naimeko no Sakato hahú iha loron 19-21
Dr. Sebastião Dias Ximenes, Provedor hateten katak “ liu husi servisu movel ba etapa primeiru iha regiaun Oecuse ne’e PDHJ hakarak hakbesik-an ba komunidade sira. Liu husi programa ne’e iha edukasaun publika no komunidade sira hato’o sira-nia keixa direkta ba PDHJ kona-ba iha indikasaun violasaun direitus umanus no mal administrasaun. Programa hakbesik-an ba komunidade ne’ebé Provedor Dr. Sebastião Dias Ximenes tun direta lori mós ekipa monitorizasaun no ekipa investigasaun”.
Iha Provedor nia intrevensaun husu ba komunidade sira atu la bele ta’uk hato’o keixa kona-ba indikasaun violasaun direitus umanus no mal administrasaun ba PDHJ tanba keixa ne’ebé komunidade sira hato’o PDHJ sei rai segredu kesar nain sira-nia identidade. Nune’e mós komunidade la bele tauk hato’o keixas kona-ba indikasaun violasaun direitus umanus no mal administrasaun tanba ida ne’e direitu sidadaun sira nian. Karik autoridades publikus sira viola sidadaun sira-nia direitu no la fó atendementu di’ak ba sidadaun sira-nia nesesidade.
Liu husi programa movel ne’e komunidade sira kestiona kona-ba projetu ne’ebé hala’o iha sira-nia suku laiha kualidade, dezastre naturais, bee mós, saneamentu, foos MTCI ne’ebé povu sira oras ne’e la hetan, falta meza kadeira nune’e estudante sira tur iha rai, pagamentu ba idozu sira no problema elektrisidade. Estudante sira mós kestiona kona-ba la iha fasilidade biblioteka no komputadores
Problema sira ne’ebé komunidade sira hato’o ba PDHJ sei rekomenda ba órgauns kompetente sira atu rezolve.
Komunidade sira iha Oesilo, Naimeko no Sakato (Nipani) sente kontente tebes ho prezensa PDHJ iha sira-nia suku, maske iha momentu ne’e udan maibé sira partisipa programa refere ho laran ksolok hodi rona no hato’o sira nia keixa ba PDHJ. Programa movel tuir planu sei haleu distritu tomak iha Timor-Leste atu nune’e PDHJ bele hakbesik-an liu tan ba komunidade liu husi fahe informasaun, simu keixa husi komunidade sira, monitorizasaun no investigasaun ba kazu violasaun direitus umanus no mal administrasaun.
Bazeia ba Konstituisaun RDTL Artigu 27, Provedor dos Direitos Humanos e Justiça nu’udar órgaun indepedente ida iha knaar atu haree no buka hatán sidadaun sira-nia problema sakar podér públiku, atu haree loloos hahalok sira ne’ebé tuir lei no halo prevensaun no hahú prosesu tomak hodi haburas fali Justiça.
Presiza Informasaun Kontaktu
Lady Ximenes & Jose Tefa
Informasaun & Relasaun Públika PDHJ
Telemovel 7304260 ou 333 1071