• pdhj hala’o workshop loron ida iha memorial hall

    Date, 18-06-2007

    Provedoria dos Direitos Humanos e Justiça, servisu hamutuk ho Ministériu da Administrasaun Estatal sei hala’o workshop ida iha Memorial Hall, Farol Dili.

    Iha workshop loron ida ne’e PDHJ konvida ba dala uluk Sekretáriu Permanente no Diretores Nasionál da Administrasaun e Finansas husi Ministériu sira hotu, nomós husi Banku Mundial nu’udar partisipantes. Workshop ba dala uluk ne’e ho nia tema: “Papel Provedór nian no Papel Ministériu da Administrasaun Estatal hodi Promove Governasaun Di’ak, Kombate Korrupsaun no Proteje Direitus Umanus”.

    Dr. Marito Magno, Diretor Nasionál Boa Governasaun, PDHJ hatete katak “Objetivu husi ne’e atu fó ba públiku knar Provedór nian no Ministériu Administrasaun Estatal, oinsa bele kria koñesimentu kona-ba prinsipius boa governasaun ne’ebé bele ajuda funsionáriu sira para bele halo sira nia knar tuir regulamentu no leis sira ne’ebé vigora”.

    Benefisiu ka Vantazen ne’ebé hein ba Workshop ne’e, Marito Magno hatutan tan katak:”Atu Kria relasaun diak entre PDHJ no Ministériu hotu-hotu ho Diretóres no Sekretáriu Permanente sira hotu. Nune’e, sira bele iha koñesementu báziku hodi ba aplika no implementa hikas fali iha sira nia Ministériu, Divizaun to’o Funsionariu Públiku sira hotu ne’ebé sira dirije bá”.

    Tuir oráriu, workshop ne’e sei realiza iha loron tersa feira 19 de Juñu de 2007, oras 08.00 – 17.30, Oras Timor Loro Sa’e.

    Dr. Ambrósio Graciano Soares, Xefe Departamentu Relasaun Governamental ne’ebé organiza Workshop ne’e hatete katak: Workshop ne’e nia objetivu atu fó koñesementu ba Diretóres no Sekretariu Permanente iha Ministériu hotu-hotu nia okos kona ba Papél PDHJ no Papél Ministériu Administrasaun Estatal atu Promove Governasaun Diak, Halakon Korrupsaun no Proteje ka defende Diretu Ema ida-idak nian”.

    Workshop ba dala uluk ne’e sei halo abertura husi Primeiro Ministro, Sr. Eng. Estanislao Aleixo da Silva. Sai nu’udar orador prinsipal maka hanesan Provedór dos Direitos Humanos e Justiça, Sr. Dr. Sebastião Dias Ximenes, sei koalia kona-ba Mandato Provedór nian, no mós Vice Ministro da Administração Estatal, Sr. Dr. Valentim Ximenes, sei koalia kona-ba Promove Governasaun Di’ak. Matéria seluk maka sei koalia iha workshop ne’e maka hanesan: “Papel husi Diresaun Nasionál Funsaun Públika”, sei hato’o husi Sr. Eng. Libório Pereira, Diretor Nasionál da Funsaun Públika, Ministériu da Administrasaun Estatal. “Papel Institutu Nasionál da Administrasaun Públika” (INAP), hato’o husi Sr. Dr. Florindo Pereira, Diretor Nasionál INAP, Ministériu da Administrasaun Estatal. “Papel Provedór nian kona-ba Kombate Korrupsaun” sei hato’o husi Sr. Dr. Amândio de Sá Benevides, Provedor Adjunto na area Anti Corrupção e Boa Governação, PDHJ. Materia ikus liu maka “Papel Provedór nian atu Promove no Proteje Direitos Humanos” sei hato’o husi Sr. Dr. Silverio Pinto Baptista, Provedór Adjunto na area Direitos Humanos, PDHJ.

    Enseramentu ba Workshop ne’e sei halo husi Sr. Sebastião Dias Ximenes, Provedór dos Direitos Humanos e Justiça.

     

     Presiza informasaun bele kontaktu ho :

    Lady Ximenes, Informasaun & Relasaun Públika PDHJ

    Numiru Kontaktu 7261843

    Númiru Kontaktu 333 1071

Comments are closed.