• PDHJ Halo Monitorizasaun Direitus Humanus

    Date: 28-02-2012

    Dili – Molok tama eleisaun presidensial, ne’ebe besik dau-daun ona, Provedoria dos Direitos Humanus no Justisa (PDHJ) sei hala’o monitorizasaun direitus humanus ho parseiru sira ne’ebe mak servisu ba direitus humanus.

    monitorizasaun ne’e  atu prevene mosu violasaun direitus humanus, atu hametin estadu ninia responsabilidade atu proteje direitus humanus, liu husi monitorizasaun ne’e bele mos fo asistensia ba vitima sira no ajuda atu halo reparasaun  ba violasaun direitus humanus no mos ofisial monitorizasaun direitus humanus bele promove no defende mudansa bainhira violasaun direitus sai institusionalizadu.

    Iha aktividade monitorizasaun ne’e, PDHJ servisu hamutuk ho parseiru sira ne’ebe servisu ba direitus humanus hanesan ONG The Asia Fundation, MAHEIN, BELUN, JSMP, Asosiasaun HAK, Forum Tau Matan (FTM) no parseiru husi ONG sira seluk ne’ebe mak servisu ba direitus humanus iha Distrito 13.

    Aktividade monitorizasaun ne’e sei realiza iha loron 29 Fevereiru  tinan ida ne’e no sei remata iha loron 19 Marsu tinan ne’e, iha loron 28 Fefereiru ofisial monitorizasaun direitus humanus PDHJ nian sei desloka ba rejional hat hanesan Baucau, Same, Maliana no Oe-cusse.

    Depois  de ofisial monitorizasaun direitus humanus ba halo monitorizasaun iha fatin sira ne’e, ofisial direitus humanus sira sei rekolha informasaun hotu ne’ebe los no metin hodi hakerek iha relatoriu.

    Rezultadu husi monitorizasaun ne’e sei fo sai ba publiku sira atu hatene, se karik iha tempu molok eleisaun ba to’o tempu eleisaun mak iha alegasaun violasaun direitus humanus no iha buat ruma ne’ebe lao la tuir lei ne’ebe iha mak PDHJ sei hato’o ba Tribunal Rekursu antes Tribunal fo sai rezultadu ba publiku.

    Aktividade monitorizasaun ne’e hetan mos suporta husi finanseiru husi ONG The Asia Fundations ho valor USD. 5.000.00, orsamentu refere aloka ba feé ba monitor husi Distrito 13 no pulsa ba komunikasaun.

     

    Publika husi Jornal Nasional Diário, 28 Fevereiru 2012, Hal 13, hakerek husi */alm