• web-site uza 1

    PDHJ Hamutuk Governantes Buka Solusaun Ba Problema Vendadores Ambulantes

    Dili : Iha loron 10 fulan Janeiru 2017, Provedor Dr. Silverio Pinto Baptista konvoka enkontru entre linhas Ministérial husi Ministério Administrasaun Estatal, Prezidente Autoridade Munisipal Dili, Ministério do Turismu, Ministério Komersiu Industria no Ambiente no Ajensia Dezenvolvimentu Nasional (ADN) hodi tur hamutuk atu buka solusaun kona-ba atuasaun Guarda Operasional Mercadoria Munisipal Dili, Saneamentu no PNTL hasoru Vendadores Ambulante sira iha Largu Lecidere Dili, iha loron 14 Dezembru 2016.
    Provedor Dr. Silverio Pinto Baptista iha abertura ba enkontru ne’e hateten katak, iha tinan kotuk, PDHJ simu keixa balun husi maluk vendadores ambulante sira ne’ebé fa’an sasan iha fatin largo Lecidere kona-ba atuasaun husi Guarda Operasaun Merkadoria Munisipal Dili (GOMMD), Saneamentu no PNTL, tanba ne’e Provedor konvoka enkontru ida ho entidades governamental sira ne’ebé liga ba asuntu vendadores ambulantes sira hodi tur hamutuk buka solusaun ba kazu ne’e.
    Provedor hatutan, atividade operasaun husi GOMMD iha baze legal hanesan deskreve iha decreto-lei 33/2008 kona-ba ijiene no ordem publika, maibe na prátika atuasaun ne’e sai hanesan violasaun direitus umanus ba vendadores ambulante sira hamutuk 50 ne’ebé sira nia sasan GOMMD foti hotu.
    Keixa ne’ebé maluk vendadores ambulante sira hato’o mai iha PDHJ, liga ba dever hanesan Provedoria Direitus Humanus no Justisa tenke simu maluk vendadores ambulante sira no mos dever tenke buka koopera ho entidades relevantes hodi tur hamutuk buka solusaun ba asuntu ne’e. Depois simu tiha keixa ne’e, konvida kedas entidades governantes balun hanesan Prezidente Autoridade Munisipal Dili no reprezentante husi MAE mai tur hamutuk hodi fó opiniaun ba malu. Husi opiniaun hirak ne’e mak sai hanesan informasaun baze ida, ho nune’e mak hakarak rona fali opiniaun husi entidades hotu atu nune’e ita bele hamosu fali solusaaun foun atu rezolve problema ne’ebé akontese hasoru ita nia maluk vendadores ambulantes sira.
    “Ita koalia iha parte direitus humanus, estadu iha dever atu proteje, respeita no hakonu sidadaun sira nia direitus humanus nian”, dehan Provedor.
    Iha fatin hanesan, Adjunto Prezidente Autoridade Munisipal Dili, Jose Smith hateten, negosiante ambulante sira ne’e hetan lisensa husi MKIA hodi fa’an sasan, maibe la’os atu fa’an iha estrada ninin.
    Nia dehan, Administrasaun Munisipal Dili ezekuta orden tuir lei. Tanba lei la fo dalan atu fa’an iha fatin públiku ne’ebé prejudika ema seluk nia saúde. Ne’e duni, nia dehan Munisiapal Dili esforsu ona hodi prepara merkadu bo’ot rua hanesan Taibesi no Manleuana, ne’ebé vendadores sira tenke ba fa’an iha neba.
    “Ami identifika ona fatin balun ne’ebé mak husik mamuk tiha, sira sai fa’an fali iha fatin seluk. Maibe, ita avizu fila-fila atu ba fatin preparadu maibe sira nunka kumpri, ”hateten nia.
    Antes ne’e, guarda munisipal nian tun ba fo hateten sira beibek maibe sira la preukupa. Fo hatene sira hanesan umana depois bolu sira ba enkontru dala hira, maibe sira la mai marka prezensa.

Comments are closed.