• PDHJ Hato’o Preukupasaun Komunidades Ba Autoridades Públiku

    Dili –Iha fulan Outubru nia laran, Provedoria dos Direitos Humanos e Justiça (PDHJ) liu husi PDHJ Delegasaun Teritorial (DT) sira hanesan DT Bobonaro, Oe-cusse, Baucau no Manufahi organiza atividade workshop hodi hato’o fali preukupasaun komunidades sira nian ba autoridade públiku sira iha nivel Munisipiu atu toma responsabilidade no buka solusaun ba preukupasaun hirak ne’ebé komunidades sira hato’o ba PDHJ wainhira hala’o atividade sesaun sosializasaun knaár Provedoria nian iha teritoria laran.

    Provedor Dr. Silverio Pinto Baptista, iha atividade workshop hateten katak, atividade ne’e hanesan parte ida atu informa ba entidades públiku sira iha nivel Munisipiu katak tinan ida ne’e, liu husi servisu delegasaun territorial haát (4) hanesan PDHJ Delegasaun Baucau, Same, Bobonaro no Oe-cusse hala’o tiha ona sesaun sosializasaun iha Suku hamutuk 60 iha Munisipiu sira.

    Durante sesaun sosializasaun knaár Provedoria nian ba komunidade sira iha Munisipiu, komunidade sira aprezenta kestaun lubuk ida ne’ebé presiza hetan atensaun husi autoridade públiku sira.

    Provedor hatutun hanesan Instituisaun ne’ebe tau matan ba protesaun no promosaun diretus humanus no promove governasaun diak, Provedor iha dever atu hato’o fali ba Governo nune’e bele  hametin sira nia planu hodi hakonu direitu komunidade sira nian.

    Diretor Delegasaun Same, Sr. Martinho Pereira hateten katak, durante tinan 1 nia laran, PDHJ Delegasaun Teritorial Same hala’o atividade sosializasaun iha Munisipiu 3 hanesan Munisipiu Aileu, Ainaro no Munisipiu Manufahi rasik.

    Atividade sosializasaun ninia objetivu atu fahe informasaun liga ho papel PDHJ, knaár, kbiít no kompetensia PDHJ. Aleinde ne’e liga ho direitus umanus baziku, governasaun diak nomos violasaun governasaun diak, violasaun domestika, violasaun bazeia ba generu, trafiku umanu no prosesu hato’o keixa. Objetu husi sosializasaun ne’e mak komunidade sira iha nivel Suku.

    Diretor hatutan katak, durante hala’o programa sosializasaun, PDHJ Delegasaun Teritorial Same simu informasaun no preukupasaun barak husi komunidade liga ho atendimentu públiku, liu-liu autoridade sira iha Munisipiu tolu ne’ebé ekipa halao atividade sesaun sosializasaun ba.

    Atividade workshop ne’ebé realiza iha PDHJ Delegasaun Teritorial 4 ne’e, hetan partisipasaun husi autoridade Munisipiu, linha Ministerial, autoridade lokais, sociadade civil, joventude no komunidades balun. No atividade sesaun sosializasaun knaár Provedoria nian ba komunidades sira iha territoriu hetan suporta financeiru husi Governo Estadus Unidos da Amerika liu husi nia ajensia USAID iha Timor-Leste no Governu New Zealand.