• “pdhj hato’o rekomendasaun keixas indikasaun violasaun direitus humanus ba fsi, unpol, pntl, f-fdtl “

    Date, 14-06-2007

    Provedόr Direitus Humanus no Justisa hato’o rekomendasaun ba keixas 23 kona-ba indikasaun violasaun Direitus Humanus ne’ebe komete husi membrus Forsa Siguransa Internasional FSI, Polisia Nasoens Unidas UNPOL, Polisia Nasional Timor-Leste PNTL no Falintil-Forsa Defeza de Timor-Leste F-FDTL, iha loron 11 Juñu ,2007.

    Adjunto Provedor Direitus Humanus Dr. Silverio Pinto Baptista hateten “PDHJ sei hakas a’an atu servisu hamutuk ho instituisoens do Estádu hirak seluk atu autores ba violasoens hasoru direitus humanus tenke lori ba justisa atu nune’e, populasaun bele tau fiar ba Estadu ida ne’e hanesan Estádo de Direito Democratico tuir lei inan Timor-Leste nian”.

     Tuir estatu PDHJ Artigu 42 Pontu 2.b koalia kona-ba ambitu kbi’it sira investigasaun nian katak, PDHJ sei la bele hala’o investigasaun ba keixas ne’ebe involve relasaun sira ka negosiasaun sira entre governo no governo seluk ruma ka organizasaun internasional ida, ne’e relasiona ho Karta de Intendimentu KdE ne’ebe maka Governo Timor-Leste asina ho Nasoens Unidas no representantes diplomatikus husi rai hirak ne’ebe iha forsa de seguransa iha Timor-Leste, iha loron 26 Janeiru 2007.

    Objetivu husi rekomendasaun ne’ebe PDHJ hato’o ba instituisaun FSI, UNPOL, PNTL no F-FDTL atu instituisaun sira ne’e bele halo investigasaun klean liu tan no bele foti medidas disiplinar tuir regulamentu disiplinar Nomor 13/2004 PNTL nian, no mos Kode do Konduta Polisía  Lei Organik Nomor 7/2004 F-FDTL nian.

    PDHJ sei kontinua hala’o monitorizasaun nafatin no hein katak, rezultadu investigasaun no medidas ne’ebe mak foti tuir regulamentu disiplinar  FSI, UNPOL, PNTL no F-FDTL nian sei fo fila ba Gabinete PDHJ diresaun DH, sei hato’o mos kopia ba parte kesar nain sira.

    Presiza informasaun kontaktu

    Rosalina Pires

    Promosaun no Edukasaun

    No telp 333 1071 ou no telemovel 7316 424

Comments are closed.