• PDHJ ho CAC Desimina Tátiku Kombate Korrupsaun no Promove Governasaun Di’ak ba Funsionárius Públikus Iha Ermera

    Ermera : Provedoria Direitus Humanus no Justisa (PDHJ), hamutuk ho Comisaun Anti Corrupsaun (CAC), desimina informasaun ba  funsionarius públiku iha Munísipiu Ermera konaba prevensaun no kombate aktu korrupsaun hodi promove governasaun di’ak no proteze direitus umanus iha servisu administrasaun públiku.
     
    Provedora Interina, Benícia Eriana Magno iha ninia intervensaun hateten, governasaun di’ak presiza administrasaun ida ne’ebé di’ak mós, no administrasaun ida ne’ebé di’ak presiza iha sensibilidade ba sidadaun sira-nia interasaun ho governu ka autoridade publiku, no iha espetativa boot ba governu no autoridade públiku sira hodi foti solusan ho efisiensia no efikasia.
     
    Governasaun di’ak liu-liu atu lori benefisiu ba povu liuhusi fó asistensia ne’ebé dignu ba povu husi haknar nain sira ne’ebé mós tenke bazeia ba prinsipius fundamentais hanesan transparensia, responsabilidade, imparsiál no efikasia, atu nune’e bele tane ás direitu báziku no dignidade ema nian.
     
    Provedora Interina informa liutan katak, transparensia maka baze ba governasaun di’ak nomós nu’udar pasu dahuluk iha prosesu kombate korrupsaun, tanba transparansia liga ho sistema sira hanesan arkivu, regulatoriu no atendementu ne’ebé mak di’ak.
     
    “Wainhira ita ko’alia konaba responsabilidade, ita la’os simplismente ko’alia konaba tarefa servisu ida nian, maibé definitivamente ko’alia mós konaba responsabilidade ba tarefa servisu ne’e iha maneira ida oportunu no efisiente”, dehan Provedora Interina.
     
    Iha fatin hanesan Prezidente Autoridade Munisipiu Ermera, José M. dos Santos iha ninia vebras palabras hateten, boa governasaun no direitus umanus nu’udar asuntu rua mais importante iha Timor-Leste, tanba bainhira atu harii nasaun ida livre husi korrupsaun maka presizamente tenke iha sistema governasaun ida di’ak no direitus umanus ida ne’ebé garantidu aseguradu.
     
    Nia hatutan, funsionarius hotu sai alvu ba hahalok sira ne’ebé bele prejudika governasaun di’ak hodi hamosu insatisfasaun ba sidadaun sira. Tan ne’e Estadu harii instituisaun sira hanesan PDHJ, CAC, Inspeksaun Gerál du Estadu (IGE), hodi hamutuk tau matan ba hahalok funsionarius publikus sira nian.
     
    “ha’u hakarak repete Amu Bispo Dom Basilio ninia liafuan katak, koandu ita respeita Maromak-Nia ukun fuan sanulu, maka ita la presiza lei barbarak tanba lei hotu-hotu ninia mahon maka Maromak-Nia ukun fuan sanulu, ne’ebé iha ukun fuan balu hateten, keta naok keta halo át ema, keta dun matak ema keta bosok, keta hakarak ema-nia kaben no sira seluk tan”, haktuir autoridade lokál ne’e.
     
    Ikus liu, Adjuntu Komisariu CAC, Luis Sampaio informa katak, se hakarak harii Estadu direitu demokrátiku, maka presiza kuda kultura hateten lae ba korrupsaun, hodi garante prosperiedade ba moris povu nian, tanba Timor-Leste daudaun ne’e la’os iha faze kultura rejeisaun maibé kultura korrupsaun, tanba funsionarius sira hatene hela katak mosu indisius korrupsaun maibe nonok deit, laiha funsionariu ida iha korazen no aten berani hodi ko’alia sai, dehan eis Diretur Ezekutivu JSMP ne’e.
     
    Workshop ba funsionarius públiku iha Munisipiu Ermera ne’e ho tema: Prevene no Kombate Korrupsaun, Hodi Promove Governasaun Di’ak no Proteze Direitus Umanus iha Servisu Administrasaun Públiku”. Workshop ne’e hala’o iha salaun Administrasaun Munisipiu Ermera hahú dia 03 to’o 4 Setembru 2019, ne’ebé sei marka prezensa mós husi Komisáriu Funsaun Públika no Inspetor Gerál du Estadu. 
     

Comments are closed.