• PDHJ, IJE no CAC Kontinua Kapasita Kargus Diresaun no Profesionais Saúde iha Ministério Saúde

    Dili – Iha loron 17, 19 to’o 21 Outubru 2016, Provedoria dos Direitos Humanos e Justiça (PDHJ) liu husi Diresaun Promosaun servisu hamutuk ho Ministério Saúde, Inspesaun Jerál Estadu no Comisaun Anti Corrupsaun (CAC) hala’o treinamentu ba funsionáriu kargus Diresaun, Xefias no Profesionais Saúde iha Hospital Nasional Guido Valadares-Dili (HNGV). Objetivu husi treinamentu ne’e, atu hasa’e koñesimentu kona-ba oinsa atu prevene hahalok korupsaun hodi promove no haburas prinsipiu governasaun diak hanesan kontrolu, efisiensia no prestasaun servisu a’as. Provedor Dr. Silverio Pinto Baptista iha serimonia enseramentu ba atividade treinamentu ne’e, hateten ba partisipantes sira katak, treinamentu ne’e hanesan parte ida husi prevensaun nian, nomos iha oportunidade ne’e sai hanesan parte ida atu promove prinsipiu governasaun di’ak, tanba wainhira koalia kona-ba servisu prevensaun parte ida mos husi hasaé koñesiemntu ba entidades públiku ne’ebé asumi kargus diresaun xefia nian. Kuandu hasaé koñesiemntu signifika katak iha koñesimentu ba prinsipiu governasaun di’ak, iha koñesimentu kona-ba tipu mal administrasaun mak ida ne’ebé ?. Provedor hatoó tan katak, durante loron hirak nia laran treinadores no oradores sira esplika material hirak ne’e sai hanesan mata dalan ida hodi sai hanesan referensia ba pesoal ida-idak hodi hala’o servisu nomos sai hanesan referensia ida wainhira atu hola dezisaun ida iha servisu fatin. Provedor espera katak, maske númeru partisipantes iha treinamentu ne’e iha ituan deit, maibe husu atu hatutan material hirak neebé treinadores sira fahe ba maluk funsioarius sira seluk, atu nune’e mauluk funsionariu sira seluk mos iha netik koñesimentu ituan kona-ba saida mak prinsipius governasaun diak no mal administrasaun. Iha fatin hanesan, Inspetor Jeral Estadu, Dr. Francisco de Carvalho hateten katak, atividade treinamentu ne’e bazeia ba akordu servisu entre PDHJ, MS no IJE hodi halo treinamentu ba profesionais saúde atu hasa’e koñesimentu kona-ba oinsa atu prevene hahalok korupsaun hodi promove no haburas prinsipiu governasaun diák hanesan kontrolu, efisiensia no protesaun servsiu a’as. Iha oportunidade ne’e, reprezentante mane no feto husi partisipantes sira sente orguilhu ba inisiativa husi instituisaun Provedoria, Inspesaun Jeral Estadu, Comisaun Anti Corupsaun no Ministério Saúde rasik ne’ebé iha inisiativa hodi kria atividade treinamentu ne’e, tanba atividade treinamentu hanesan parte posetivu teb-tebes ba ami nudar profesionais saúde hodi hasa’e kapasida diak liu tan ba future.

Comments are closed.