PDHJ – IJE Realiza Treinamentu Governasaun Di’ak Ba Kargus Diresaun, Xefias no Professionais Saúde Hospital Referensia Maubisse

Dili – Provedoria dos Direitos Humanos e Justiça (PDHJ) liu husi Diresaun Governasaun Di’ak servisu hamutuk ho Inspesaun Jeral Estadu (IJE) no Ministério Saúde (MS) realiza treinamentu kona-ba governsaun di’ak ba kargus Diresaun, Xefias no Professinais Saúde iha Hospital Referensia Maubisse-Munisipu Ainaro, durante loron 4 hahu husi loron 20 to’o 23 Juñu 2016.

Treinamentu konjunta entre PDHJ, IJE no MS ho topiku “Kapasita no Hasa’e Koñesimentu Funsionalismu Públiku iha área Saúde, hodi Promove Governasaun Di’ak”.

Provedor, Dr. Silverio Pinto Baptista, iha abertura ba treinamentu ne’e hateten katak, atividade treinamentu konjunta ne’e, ho nia objetivu atu hakbi’it no hasa’e koñesimentu funsionariu públiku sira ne’ebé iha kargu Diresaun, Xefias no Profisionais Saúde, atu nune’e bele iha koñesimentu kona-ba papel PDHJ, papel IJE, papel Isnpesaun Jeral Saúde no papel CAC, atu nune’e bele garante no asegura sistema kontrolu ne’ebé efisiensia, efikasia, transparensia no akuntabilidade iha servisu administrasaun públika hodi promove governasaun di’ak.

Provedor hatutan, objetivu seluk mak atu hakbi’it koñesimentu partisipante sira kona-ba prinsipiu governasaun di’ak no kategoria violasaun ba governasuan di’ak atu bele prevene administrasaun la di’ak, hodi nune’e funsionariu sira ne’ebé hakna’ar a’an iha administrasun públika bele serbi ho integridade, imparsial no responsabilidade tuir lei ne’ebé regula atu bele presta servisu ne’ebé di’ak ho kualidade no profesionalismu ba komunidade sira.

Iha aprezentasaun materia kona-ba papel PDHJ nian, Provedor esplika kona-ba kompetensia PDHJ atu halo investigasaun, monitorizasaun no promosaun no edukasaun.

Provedor mos esplika klean liu tan kona-ba servisu PDHJ, atu simu kesar husi sidadaun hotu, no halo  investigasaun no rezultadu investigasaun rekomenda ba Ministériu relevante, tanba tuir estatutu Provedoria nian, hato’o deit rekomendasaun no haruka ba Ministériu ka Instituisaun relevante, atu foti asaun hodi implementa rekomendasaun husi PDHJ atu bele hadia failansu ne’ebé akontese hodi promove governasaun di’ak.

Matéria sira ne’ebé fasilitadór sira hato’o durante treinamentu mak hanesan Papel PDHJ, Prinsípiu Báziku Governasaun Di’ak no Kategoria Violasaun Governasaun Di’ak, Papél Inspesaun Jerál Estadu, Importansia Aplikasaun Kontrolu Internu, Dezempeñu Dedikasaun no Integridade, Papel Comisaun Anti Korrupsaun (CAC), Tipu no Forma Korrupsaun iha Setor Públiku, Direitu no Dever Funsionariu Públiku no Papel Inspesaun Jeral Saúde.