• PDHJ-KAK-IJE no KFP Asina Akordu Servisu Hamutuk Hodi Kombate Korrupsaun

    Dili –  Provedoria Direitos Humanos no Justiça (PDHJ) liu husi  Diresaun Boa Governasaun Departementu Promosaun no Edukasaun, iha loron 22 Outubru 2015, asina akordu entre Komisaun Anti Korupsaun (KAK), Komisaun Funsaun Públika (KFP), Inspesaun Jeral Estadu (IJE) iha salaun Ministériu Solidariedade Sosial-Caikoli Dili.

    Provedor de Direitus Humanus no Justiça (PDHJ) Dr. Silverio Pinto Baptista iha nia diskursu hateten katak, objetivu husi asina akordu ida ne’e, atu servisu hamutuk hodi prevene no kombate korupsaun hodi Promove Governaaun Di’ak, no Proteje Direitos Humanos  iha Administrasaun Públika.

    Provedor hatutan katak, partisipantes ne’ebé partisipa iha eventu ida ne’e sai hanesan sasin ba asina memorandum entre instituisaun 4 ne’e hodi kontrolu makina estadu nian.

    Provedor informa liu tan katak, asina kordu ida ne’e, loke dalan ba ita hotu nudar servisu do povu tantu husi Primeiro Ministro, Ministro sira, kargu xefia sira inklui mos funsionário públiku sira hotu atu tau intere estadu a’as liu hodi promove governasaun di’ak no prevene korrupsaaun.

    “Akordu ne’ebé ami nain ha’at  asina ne’e sei hatun ba iha tekniku sira atu implementa, tamba hau lakohi ita asina akordu deit maibe ita la implementa”, Provedor haktuir.

    Iha fatin hanesan, Komisário Komisaun Anti Korrupsaun (KAK), Dr. Aderito Tilman hateten, loron ohin hanesan loron historiku ida ba instituisaun ha’at ne’e servisu  hamutuk hodi kombate korupsaun, tamba korupsaun hanesn hahalok ida ne’ebé mosu hodi hasusar povu no hafoer estadu Timor – Leste nia naran iha mundu.

    Komisario reforsa katak, korrupsaun hafoer moral públiku no afeta ba moral hodi rezulta konfiansa husi povu no foti estadu nia riku soin hodi  benefisia nia a’an atu halo terus povu iha nasun Joven Timor-Leste. KAK tau interese a’as liu ho Instituisaun seluk hodi kombate korrupsaun tamba korrupsaun hanesan, hahalok ida ne’ebé akontese hodi benefisia ema ida rua nia a’an duke interese povu no nasaun nian.

    Entertantu, Inspetór Jerál do Estado (IJE), Sr. Francisco de Carvalho informa katak, akordu ne’ebé Instituisaun ha’at asina ne’e hanesan meius ida atu prevene no kombate korrupsaun, hodi promove Governasaun Di’ak iha Administrasaun Publika.

    Francisco hatutan katak, akordu ne’ebé instituisaun ha’at asina laos servisu hamutuk hodi hatama ema ba prizaun maibe sirvisu hamutuk atu prevene siddaun sira labele hetan xamada husi KAK no PDHJ nomos instituisaun  seluk.

    Presidente Komisaun Funsaun Públika, Prof. Dr. Faustino Cardoso mos informa katak, atu kombate korrupsaun laos ema ida rua deit maibe kombate korrupsaun persiza ema hotu nia kolaborasaun, hodi Promove Governasaun D’iak iha Administrasaun Públika.

    Partisipa iha asina akordu entendimentu ne’e mak hanesan, Ministro Justiça (MJ) Dr. Ivo Valente, Ministro Estatal Dr. Deonisio Babo, Adjunta Provedor no Adjuntu Komisariu KAK, Diretores sira husi Instituisaun 4 ne’e, nomos Funsionárius sira.

Comments are closed.