• PDHJ, MAE, MSS Renova Akordu Servisu

    SONY DSCDili– Liu husi kooperasaun servisu hamutuk entre Provedoria dos Direitos Humanos e Justiça (PDHJ) Diresaun Direitus Humanus, Ministério Administrasaun Estatal (MAE) no Ministério Solidariedade Social (MSS) ne’ebé hametin servisu liu husi  asina nota entendementu iha tinan 2011,  ho objetivu  atu eleva kapasitasaun ka treinamentu  ba  Lideransa Komunitaria sira iha Timor Leste tomak kona-ba direitus humanus, rezolusaun konflitu no mediasaun hodi garante kontrolu ne’ebe di’ak, efisiensia no efikas.

    Tan ne’e, iha loron 31 Marsu 2015, instituisaun 3 ne’e renova hikas nota entendementu ne’e atu kontinua fo treinamentu ba Lideransa Komunitaria sira tomak iha tinan ida ne’e nia laran.

    Adjunto Provedor ba área Direitus Humanus, Dr. Horacio de Almeida iha nia abertura hateten katak, objetivu husi renovasaun nota entendementu ne’e  atu kontinua fo kapasitasaun ka treinamentu ba Lideransa Komunitaria sira, atu nune’e bele iha koñesimentu ne’ebé di’ak kona-ba direitus humanus, rezolusaun konflitu no oinsa atu sai mediador wainhira mosu problema iha fatin ida-idak nian.

    Adjuntu haktuir tan katak, ho kooperasaun servisu ne’e, hanesan meius ida ne’ebé importante tebes ba instituisaun estadu, governo liu-liu hanesan instituisaun indepedente hanesan instituisaun Provedoria tanba kna’ar husi instituisaun Provedoria nian mak atu hare kona-ba promosaun no protesaun direitus humanus nomos halo promosaun ba área governasaun di’ak.

    Renovasaun nota entendimentu ne’e, asina husi Direitur Direitus Humanus PDHJ, Sr. Valerio Magno Ximenes, Direitur Nasional ba Diresaun Nasional Apoio Administrasaun Sucos (DNDSAS) Ministério Administrasaun Estatal (MAE), Sr. Sebastião Jose Luis dos Santos Pereira no Direitur Nasional Assistencia Cesaun Social (DNACS) Ministério Solidariedade Social (MSS) Sr. Amandio Amaral Freitas, no akompaña husi Adjunto Provedor ba área Direitus Humanus Dr. Horacio de Almeida.

Comments are closed.