PDHJ-Munisipiu Dili Deskute Jestaun Ba lixu No Negosiante Ambulante

Dili : Loron 13 Dezembru 2018, Provedora Direitus Umanus No Justisa, Jesuina Maria F. Gomes, akompaña husi xefe Gabinete, Director Fiskalizasaun no Diretora Asistensia Publiku hala’o enkontru ho Adjuntu Prezidente autoridade Munisipiu Dili, José F. X. Smith, ho nia ekipa iha salaun enkontru Munisipiu Dili.
Objetivu husi enkontru ne’e koalia kona ba Jestaun ba lixu no negosiantes ambulante sira, ne’ebé dadaun ne’e halao hela aktividade negosiu iha sidade dili.
Tuir Provedora katak, importante tebes atu kria jestaun ba lixu ne’ebé diak tanba ho tempu udan ne’ebe iha mak foer sira la hamos no soe arbiru mak bele kria ambiente ne’ebé ladiak hodi ikus mai bele hamosu moras hanesan dengue ba iha ema nia saude.
Tanba ne’e importante tebes atu autoridade munisipiu sira presija koopera mós ho lider komunitariu sira para hodi kria regulamentu jestaun ba lixu ne’ebé diak ba iha komunidade suku idak-idak nian.
Nune’e komunidade sira mós hamutuk hodi hakruk ba regulamentu ne’ebé iha hodi la soe foer arbiru no kria ambiente mós ba iha sira nia bairu laran.
Maske nune’e kona ba negosiante ambulante nian rasik Provedora haktuir katak, ne’e hanesan atu follow up de’it tanba asuntu ida ne’e antes ne’e Provedoria ho Munisipiu dili sempre halo hela deit enkontru.