• pdhj no ombudsman republik indonesia (ori) asina memorandum de entendimentu

    Date, 29-11-2011

    Provedoria dos Direitos Humanos e Justiça (PDHJ) asina Memorandum de Entendimentu ho Ombudsman Republik Indonesia (ORI) atu hametin koperasaun no servisu hamutuk. Memorandum ne’e asina diretamente husi  Dr. Sebastião Dias Ximenes, Provedor ho Danang Girindrawardana, Ketua ORI iha Sesta loron 25 Novembru 2011 iha edifisiu ORI Jakarta-Indonezia.

    Dr. Sebastião Dias Ximenes, Provedor depois de asina akordu hateten katak liu husi akordu servisu hamutuk ne’e bele hametin relasaun di’ak no servisu hamutuk entre instituisaun independente rua husi Indonezia no Timor-Leste nune’e mós nu’udar eventu estrategiku ida atu hametin relasaun entre paiz rua (Indonesia ho Timor Leste liu-liu instituisaun Ombudsman husi rai rua nune’e bele serbi di’ak liu tan komunidade sira liu husi knaar mandatu ne’ebé iha.

    “Ho akordu ne’e bele iha programa kapasitasaun ba funsionarios PDHJ, tanba PDHJ nu’udar órgaun independente ne’ebé foun presiza tebes no nesesita duni atu aumenta kualidade rekursu humanos ne’ebé iha. Alein de ida ne’e sei hala’o mós workshop bilateral entre nasaun rua ne’e” hateten Provedor.

    “Iha oportunidade neé Provedor hato’o agradesimentu ba ORI tanba bele iha boavontade hodi simu PDHJ hodi halo akordu hamutuk. Provedor espera katak, relasaun entre instituisaun rua ne’e bele la’o di’ak liu tan.

    Iha sorin seluk Danang Girindrawardana, ketua Ombudsman Indonezia (ORI) hateten sente urgulho tanba bele halo akordu servisu ho PDHJ. Tanba geografikamente Timor-Leste no Indonezia iha buat barak maka hanesan. Danang haktuir katak Presidente RI fó apelu ba ORI liu husi dekretu lei Númiru 72 Tinan 2011 iha artigu ida husu ba ORI atu ajuda estadu hodi bele halo rekonsiliasaun ho Timor Leste. Ida ne’e hatudu duni respeitu no hakarak iha komitementu atu realiza rekonsiliasaun liu husi ORI nia servisu no PDHJ. Ketua ORI simu ho di’ak akordu servisu hamutuk mak hala’o establese ne’e.

    Entretantu depois de asina akordu ho ORI Provedor mos hasoru malu ho embaixador Inglatera nian ba Indonezia no Timor-Leste iha nia servisu fatin Jakarta. Liu husi hasoru malu Provedor esplika servisu PDHJ nian no koalia konaba situasaun direitus humanos iha Timor Leste. Nune’e mos Provedor husu karik Embaixada bele fo apoio ba PDHJ liu-liu ba kapasitasaun rekursus humanus.

    Bazeia ba Konstituisaun RDTL Artigu 27, Provedor dos Direitos Humanos e Justiça nu’udar órgaun indepedente ida iha knaar atu haree no buka hatán sidadaun sira-nia problema sakar podér públiku, atu haree loloos hahalok sira ne’ebé tuir lei no halo prevensaun no hahú prosesu tomak hodi haburas fali Justiça.

    Presiza Informasaun Kontaktu

    Lady Ximenes, TP Relasaun Públika PDHJ

    Telemovel 7304260