• PDHJ-PNTL Asina Akordu Servisu Hamutuk

    Dili, iha loron 27 Maiu 2016, Provedoria dos Direitos Humanos e Justiça (PDHJ) ho Polisia Nasional Timor-Leste (PNTL) asina akordu servisu hamutuk hodi fó formasaun iha area direitus umanus nian ba membrus PNTL sira iha Munisipiu 13 inklui Rejiaun Administrativa Espesial Oe-cusse Ambeno (RAEOA).

    Akordu ne’e asina direita husi Diretur Nasional Direitus Umanus, Sr. António M. S. da Costa Lopes no Diretur Nasional ba Sentru Formasaun Polisia, Sr. Superintendente Arquimino Ramos.

    Provedor, Dr. Silverio Pinto Baptista iha serimonia ne’e hateten katak, PDHJ iha komitmentu tomak atu servisu hamutuk duni ho Komandu PNTL liu-liu ho Sentru Formasaun Polisia atu ita kontinua la’o hamutuk hodi fó formasaun ba ita nia membrus Komandu PNTL iha Munisipius sira tanba intensaun Provedoria nian katak ita halo prevensaun ba kazu ne’ebé liga ho violasaun direitus umanus.

    Provedor hatutan katak, dala ruma violasaun direitus umanus husi membrus PNTL sira halo tanba falta koñesimentu ba instrument legais sira ne’ebé mak Timor-Leste aplika no instrument ne’ebé mak ratifika. Tanba ne’e PDHJ hanesan pioneer ba proteje no promove direitus umanus iha dever Provedoria nian atu buka koopera ho instituisaun estadu hotu, hodi nune’e bele halo prevensaun ba violasaun direitus umanus iha rai laran.

    Iha fatin hanesan, Segundu Komandante PNTL, Komisariu Faustino da Costa hateten katak, akordu ne’e halo hodi fó formasaun ba membrus PNTL liu-liu iha area direitus umanus nian.

    “liu husi kooperasaun ne’e bele fó tan informasaun ba membrus sira iha terrenu para nune’e sira iha koñesimentu hodi hala’o sira nia servisu karik bele evita ona violasaun saida mak akontese tiha ona iha pasadu”, Komisariu Faustino da Costa dehan.

    Programa formasaun ba membrus PNTL ne’e la’o tiha ona maibe foin mak ofisialmente halo akordu ne’e, hodi nune’e sai hanesan baze ba kooperasaun.

    Atividade asina nota entendimentu ne’e, akompaña husi husi Provedor, Dr. Silverio Pinto Baptista no Segundu Komandante PNTL, Komisariu Faustino da Costa no asiste direitamentu husi Adjuntus Provedor nain 2, Diretur Jeral PDHJ no formadores sira husi instituisaun 2 ne’e.

Comments are closed.