• PDHJ Realiza Enkontru Públiku Ho Funsionariu Saúde Munisipiu Viqueque no Lautem

    Dili- Provedoria dos Direitos Humanos e Justiça (PDHJ) Diresaun Boa Governasaun Departamentu Prevensaun no Monitorizasaun hala’o Enkontru Publiku kona-ba “Sistema Distribuisaun Ai-moruk Iha Timor Leste” durante loron rua (2) iha  Servisu Saude Munisipiu Viqueque, ne’ebé realiza iha loron 29 Marsu 2016 no Servisu Saude Munisipiu Lautem, realiza iha loron 31 Marsu 2016.

    Adjuntu Provedor ba area Direitus Umnanus, Dr. Horacio de Almeida iha abertura hateten ba partisipantes sira katak, objetivu husi sesaun enkontru públiku ne’e hanesan parte ida atu rekolha tan pontus-pontus informasaun adisional balun ne’ebé mak PDHJ seidauk konsege rekolha hotu.

    Provedor Adjuntu husu ba partisipantes sira atu fo sira nia opiniaun no komentariu kona-ba dadus distribuisaun ai-moruk mak PDHJ halibur ona, karik sei falta informasaun ruma mak seidauk kompleta husu informasaun adisional hodi kompleta. No mos husu ba partisipantes sira atu fo sira ninia sujestoens kona-ba rezultadu analiza, konkluzaun no rekomendasaun maka PDHJ dezenvolve ona liu husi materia aprezentasaun rezultadu peskiza ninian.

    Iha sesaun ba aprezentasaun rezultadu peskiza “Sistema Distribuisaun Ai-moruk Iha Timor Leste”, partisipantes sira antusiazmu no apresia ho rezultadu peskiza PDHJ nian ne’e, hanesan meius importante ida atu bele fasilita liu tan sira nia prestasaun servisu iha parte atendimentu publiku. Aliende ne’e, partisipantes sira hato’o sira nia informasaun, komentariu, opiniaun no sujestaun adisional sira ligadu ho rezultadu peskiza husi PDHJ nian ne’ebé aprezenta ona.

    Entretantu iha seremonia enseramentu ba enkontru ne’e, Provedor Adjunto hato’o agradesimentu ba partisipantes sira ne’ebé fó sira nia informasaun adisional. Nomos Provedor Adjuntu hamenu hela ba sira katak sira nia informasaun hotu sei halo reanaliza hodi bele reforsa liu tan iha parte rekomendasaun mak PDHJ dezenvolve ona iha relatoriu monitorizasaun ninian, antes atu publika ba publiku no rekomenda ba Ministeriu kompetente atu bele hola responsabilidade para hadiak.

    Atividade enkontru públiku ne’e, realiza iha servisu fatin Saúde Munisipiu Viqueque no Lautem ,ne’ebé hetan partisipantes husi Delegadu Servisu Saude Munisipiu Viqueque, Delegadu Servisu Saude Munisipiu Lautem ho sira ninia komutiva hanesan Chefe Sentru Saude Infermária, Chefe Sentru Saude Komunitaria, Medikus Jerais, Enfermeiru/a, Farmasistas no parteiras.