• pdhj realiza workshop ba autoridade komunidade sira

    Date, 01-08-2008

    Provedoria dos Direitos Humanos e Justiça (PDHJ) liu husi diresaun Boa-Governasaun realiza workshop ba autoridade komunitaria, xefe seksaun sira no PNTL iha sub distritu Balibó no Atabae distritu de Bobonaro iha loron 29-30 Jullu 2008.

    “Objetivo husi workshop ne’e atu fó koñesimentu báziku kona-ba governasaun ne’ebé transparente no iha akuntabilidade no UU no 31/1999” hateten Marito Magno Director Boa-Governasaun.

    “Governasaun ne’ebé di’ak sei hetan benefísiu ne’ebé di’ak ba povu ne’ebé governa ba. Tanba iha sistema oi-oin ne’ebé aplika iha sistema governasaun ida nia laran, tenke bazeia ba prinsípiu fundamental ne’ebé transparente iha akuntablidade no mós respeitu ba direitu no dignidade ema ida-idak nian” hatutan Marito.

    “Marito espera katak, ho prinsípiu ne’ebé estabelese ho intelijénsia no konxiente, konserteza sei hakat to’o governasaun ne’ebé forte no iha kbiit hodi sai atan no servidor ba ema hotu”.

     Partisipante sira ba workshop ne’e kuaze ema nain 100 mai husi autoridade komunitaria, xefe seksaun sira no PNTL husi sub distritu Balibó no Atabae distritu Bobonaro.

    Oradór iha workshop ne’e mak Dr. Amandio de Sá Benevides, Adjuntu Provedor, Dr. Aderito Tilman, Prokurador, Dr. Marito Magno Director Boa-governasaun (PDHJ).

       

    Presiza informasaun kontaktu

    Lady Ximenes, Informasaun & Relasaun Públika PDHJ

    HP, 7304260 ou 333 10701