• pdhj sai mediador ba kazu komunidade husi atauro

    Date, 07-07-2011

    Provedoria dos Direitos Humanos e Justiça (PDHJ) iha loron  06 fulan Jullu 2011 liu husi Diresaun Boa Governasaun fasilita mediasaun ba keixa husi sidadaun rua husi Sub Distritu Atauro ho númeru 060/2010 / BG. Kazu neé tama iha gabinete PDHJ iha fulan jullu tinan 2010 husi senhor ho inisial BC hasoru senhor ho inisial MS kona-ba defamasaun. Antes ne,e ekipa mediador kontaktu liu husi via telephone ba parte rua hodi bele disponivel hiit-an mai Dili hodi tuir  prosesu mediasaun neébe fasilita husi mediador.

    Dr. Rui Pereira dos Santos, Provedor adjuntu ba area boa-governasaun hateten “bazeia ba regras mediasaun nian katak, bainhira mediasaun ne,e lao, parte rua hakarak ho laran duni atu rezolve (voluntáriumente). Alien ida neé la obriga husi parte terseiru no tempu neébe mak determina depende ba parte rua mak desidi”.

    Adjunto Provedor hatutan tan katak, funsionariu PDHJ hanesan mediador nia pozisaun imparsial, neutral, fasilita prosesu tomak, tulun parte sira, la foti desizaun ba problema ne,e, la fo konsellu, rai sigredu, la halo presaun ba parte rua no mós iha duni vontade ho voluntáriu atu fasilita prosesu tomak mediasaun.

    Rezultadu ikus husi mediasun ba kazu referee hetan duni akordu hamutuk husi parte rua no mos parte rua hatudu duni sira nia kooperasaun diak ho instituisaun PDHJ neébé sira hato,o keixa ba. Nuneé husi mediasaun neébé lidera husi funsionariu PDHJ parte rua konkorda hamutuk hodi rejolve sira nia problema liu husi dalan dame malu.

    Dr. Rui hateten ho rejultadu mediasaun mak iha ida neé pasu importante ida ba Timor oan tomak hodi bele kolabora ho PDHJ atu bele halaó knaar tuir mandatu maka iha.

    Tuir Lei No. 7/2004 Estatuto Provedór de Direitos Humanos e Justiça, husi artigu 38 pontu 1 hateten katak, Provedór Direitus Umanus no Justisa nian bele hala’o knaar nu’udar mediador ida ka konsiliadór ida iha konflitu ida entre keixozu ida no entidade ka órgaun ne’ebé sujeitu ba kesar ne’e, bainhira parte rua ne’e hatan malu atu hatada prosesu ida hanesan ne’e.

     

    Presiza Informasaun

    Kontaktu Lady Ximenes, Númeru Tel : 730 4260

    ou Jose Tefa Númeru Tel : 735 1412 ou 3331071 Relasaun Públika PDHJ