• PDHJ Sai Mediador ba Problema Vendedores Ambulantes

    Dili : Provedoria Direitus Humanus no Justisa (PDHJ) hanesan mediador, komvoka runiaun meja redonda hodi komvida reprezentante vendedores ambulantes, sosiedade sivil, governu, no parte seguransa, atu hamutuk foti medidas nesesáriu hodi fó solusaun ba problema vendedores ambulantes.

    Iha intervensaun, Provedor Adjuntu Boa Governasaun, Sr. Miguel Pereira de Carvalho hateten, laiha lei espesífiku ida bandu atividade vendedores ambulantes, tanba Dekretu Lei Nú. 33/2008 ko’alia deit konaba hijiene no atividades sira ne’ebé perturba ordem públiku.

    Atividades hirak ne’ebé perturba ordem públiku maka atividades hanesan tau kontentor iha trotoar leten ka iha loja oin, no atividades hirak ne’ebé la hijiéniku maka atividades sira hanesan soe bee foer husi uma ka lojas sira ba baleta. Maske nune’e, iha diskusaun meja redonda ne’ebé hala’o iha Segunda, 05/08/2019 ne’e, Komandante Polisia Munisipiu Dili Superintendenti, Armando Monteiro hato’o ninia preokupasaun konaba hijiene iha tasi ibun Lita Store nia oin, tanba nia identifika katak vendedores balu ba soe fali foer kiik no boot iha tasi ibun.

    Hatan ba preokupasaun ne’e, reprezentante vendedores ambulante, Joana dos Santos hateten, sira prontu koopera ho autoridade munisipiu Dili hodi hamoos foer ne’ebé sira produs, no promete sei la soe foer arbiru. Atu hanoin ida ne’e realiza, maka Provedor Adjuntu husu ba Ministériu Comersiu Industria no Ambiente atu hadia toilet temporariu ne’ebé governu monta iha Largo Lecidere kopletamente ho bee atu ema bele uza.

    Entertantu reprezentante sosiedade sivil Asosiasaun HAK, Adelio da Costa Fernandes husu ba governu atu fó solusaun ba problema vendedores ambulante ho dignu, hodi labele impede komunidade buka sira-nia moris. Hatan ba preokupasaun ne’e, Diretor Ezekutivu SERVER.Ip, Florencio Sanches hateten, governu laiha hanoin atu bandu atividades vendedores ambulante. Governu nia hakarak maka, atividades hirak ne’e tenke sertifika liu husi rejistu komersiál ida, hodi nune’e bele kontribui hatama reseitas ba estadu. Hanesan mediador, PDHJ sei hato’o rekomendasaun ba entidades relevantes para bele foti medidas nesesáriu hodi fó solusaun ba problema vendedores ambulantes.

Comments are closed.