pdhj sei hatoó rekomendasaun ba ministeriu relevantes kona-ba utiliza patrimonio estado iha kampaña parlamentar
Date ; 14-07-2012
Viqueque – Tuir Monitorizasaun husi ekipa Monitoring Provedoria dos Direitos Humanos e Justiça (PDHJ) iha aktividade kampanha Eleisaun Parlamentar (ELPAR) ba partido CNRT ne’ebe hala’o iha Distrito Viqueque Villa iha loron 12 Junhu 2012 utiliza patrimonio do estadu mak hanesan kareta ne’ebe utiliza husi membrus deputadus balun iha Parlamento Nasional husi bankada CNRT ho naran inisial xxx ho numeru matrikula MP 88,52 no mos iha kareta balun ne’ebe la uza xapa matrikula polisia.
Durante iha aktividade kampanha ne’e, iha mos kareta balun ne’ebe la uza xapa matrikula maske iha fatin kampanha iha Polisia Nasional Timor Leste (PNTL) maibe husi parte polisia la foti medidas hodi husu ba motorista atu hatene razaun saida mak transporte ne’e la uza xapa matrikula.
Entertantu iha kampanha ne’e, partidu refere hato’o ninia programa ba militantes no simpatizantes atu oinsa programa ne’e bele lao ba oin no oinsa atu buka solusaun hodi resolve povu nia preukupasaun.
Adjunto Provedor ba area Direitus Humanus, Dr. Silverio Pinto Baptista hateten katak, Provedoria dos Direitus Humanos e Justiça (PDHJ) hanesan instituisaun independente ho funsaun atu proteje no promove direitu cidadaun sira nia direitu no promove governasaun diak.
Kona-ba militantes partido balun ne’ebe utiliza patrimonio de estadu, Adjunto Provedor hateten katak, tuir rezultadu monitorizasaun PDHJ iha Distrito balun ne’ebe militantes partido politika sira utiliza patrimonio de estadu, PDHJ sei kontinua halo monitorizasaun hodi hatene militantes partidu ne’ebe uza patrimonio de estado sei mak uza no husi ministerio ne’ebe, no bainhira remata aktividades kampanha, PDHJ sei hato’o rekomendasaun kompletu ba orgaun kompatente hodi foti medidas.
Iha Distrito Manufahi, partido FRETILIN hala’o kampanha iha Aldeia Ria Lau (Merkado Lama) Suco Letefoho, Sub-Distrito Same, Distrito Manufahi iha loron 12 Junhu 2012 ho modelu comisiu, ekipa monitorizasaun PDHJ nota katak, Iha duni involvementu husi funcionariu públiku balun iha fatin kampanha no mos patrimonio de estadu balun hanesan motor lima mak uja hodi partisipa iha aktividade kampanha ho numeru matrikula polisia 4088-G husi Ministerio Solidaridade Social (MSS), 3076-G, 2372-G Eis Chefe Suco, 1529-G husi Ministerio Sáude no , 4333-G husi SAS.
Entretantu Adjunto Provedor mos hateten katak komprimisu politika nebe mak leaders partidu sira promete iha tempu kampanha ne’e hanesan bosok deit povo hodi hetan votus.
“Tanba realidade militante no simpatizante balu sei usa nafatin patrimoniu estado hodi ba tuir kampanha hanesan nebe mak hetan iha Distritu Viqueque no Distrito Manufahi,”esplika Adjuntu Provedor. Iha fatin aktividade kampanha, ekipa monitorizasaun PDHJ halo koordinasaun ho Komandante Unidade Transit PNTL Distrito Manufahi, Fernando da Costa hateten katak depois mak sira halo aprosimasaun ba instituisaun refere.
Presiza Informasaun bele kontakto, Lady Ximenes, Hp 7304260 & Jose Tefa ho numeru telephone; +670 735 1412 0u +670 333 1071 (Relasaun Publiku PDHJ)