• Web-site Seleb

    PDHJ Selebra Loron Mundial Direitus Umanus Ho Komunidade Aileu

    Aileu – Provedora, Jesuina Maria Ferreira Gomes, MPA hateten katak, Provedoria dos Diretos Humanos e Justiça (PDHJ), nu’udar instituisaun nasionál ida independente ne’ebé iha mandatu espesífiku rua mak hanesan promove no proteje direitus umanus no promove governasaun di’ak.

    Hanesan Instituisaun ne’ebé tau matan ba entidades publiku sira hotu no defende povu sira nia direitu, presiza iha atividades hodi hasa’e koñesimentu no habelar informasauan ba povu tomak iha rai doben Timor-Leste.

    “Tanba ne’e kada tinan-tinan PDHJ selebra loron Mundial Direitus Umanus hamutuk ho komunidade sira iha área teritoriu Timor-Leste nia laran, ba tinan 2018 PDHJ selebra loron mundial direitus umanus ba dala 70 hamutuk ho komunidades sira iha Suku Liu Rai Posto Administrativa Aileu Vila Munisipiu Aileu, aleinde komemora iha Munisipiu, PDHJ servisu hamutuk ho Casa Sivil Prezidente Repúblika, Ministério Justisa, Komisaun Anti Korupsaun, Sosiadade Sivil no Direitus Umanus ONU iha Timor-Leste komemora iha Munisipiu Dili, atu nune’e komunidade sira bele hatene kona-ba ezistensia Provedoria hanesan orgaun estadu hodi promove no proteje povu sira nia direitus umanus”, dehan Provedora

    Provedora dehan katak, kada tinan Provedoria selebra loron mundial direitus umanus ho objetivu hodi relembra fali loron 10 Dezembru núdar loron importante ba ema hotu-hotu hodi rekoñese ema nia Direitu Umanus no mos hodi hametin liu tan kooperasaun servisu entre PDHJ no autoridades lokal, sosiadade sivil hodi promove no proteje direitus umanus no promove governasaun di’ak iha Nasaun Timor –Leste.

    Iha atividade refere realiza mos atividade lubuk ida mak hanesan kuda ai oan iha Aldeia Laclo Suku Liu Rai Posto Administrativa Aileu Vila Munisipiu Aileu, desimina informasaun kona-ba servisu PDHJ nian liga ba asuntu direitus umanus no governasaun di’ak, entrega lembransa direitus umanus ba komandante PNTL Minisipiu, kompetisaun sertame no diskursu ba estudante Pre-Sekundaria no Sekundaria, no jogo amizade volly boll feto no mane no jogo amizade tebe bola entre PDHJ no Juventude mane Suku Liu Rai.

    Provedora esplika liu tan katak, Provedoria hari’i husi konstituisaun Repúblika Demokrátia Timor-Leste iha tinan 2002, nu’udar resposta xave estadu nian atu enfrenta dezafiu sira ne’ebé nasaun ne’e hasoru hodi hari’i sosiedade ida ne’ebé demokrátiku no justu.

    Aleinde ne’e mos, Provedora Interina hatutan, bazeia ba artigu 27 konstituisaun Repúblika Demokratika Timór-Leste, prevee ona kona-ba ezisténsia PDHJ, nu’udar órgaun independente, ne’ebé iha knaar atu haree no buka hatán ba sidadaun sira-nia problema hasoru podér públiku sira no atu haree loloos hahalok sira, ne’ebé tuir lei no halo prevensaun hodi hahú prosesu tomak hodi haburas fali justisa, no nia mós sei iha kompeténsia atu haree kazu konkretu sira, maske laiha kbiit atu hakotu-lia nia bele hato’o lia-menon ba órgaun kompetente sira.

Comments are closed.